ԵՐԵՎԱՆ, 2 ՓԵՏՐՎԱՐԻ, ԱՐՄԵՆՊՐԵՍ: Ֆրանսիայի արտաքին գործերի նախարար Ալեն Ժյուպեն ևս մեկ անգամ իր տեսակետն է հայտնել Հայոց ցեղասպանության ժխտումը քրեականացնող օրինագծի առնչությամբ: Ինչպես հաղորդում է «Արմենպրես»-ը՝ վկայակոչելով Le Monde-ը, Ֆրանսիա-Իսրայել հիմնադրամի կողմից կազմակերպված ճաշի ընթացքում Ժյուպեին հարցրել են, թե արդյոք իր և երկրի ղեկավարի միջև հակասություններ կան այս հարցում: «Ես մեկ անգամ արդեն մեջբերել եմ Ժան-Պիեռ Շեվենմանին և դա կանեմ նորից «նախարարը պետք է փակի իր բերանը կամ հեռանա»: Ուստի այս մասնավոր պարագայում ես փակում եմ իմ բերանը»,- ասել է Ժյուպեն:

Ֆրանսիայի կառավարության հունվարի 31-ի նիստի ընթացքում Ֆրանսիայի նախագահ Նիկոլա Սարկոզին հայտարարել էր, որ Ցեղասպանությունների ժխտումը քրեականացնող օրինագծի հակասահմանադրական ճանաչվելու դեպքում նոր օրինագիծ կդնի շրջանառության մեջ: Օրինագծին դեմ հանդես եկող նախարարներին՝ ԱԳ նախարար Ալեն Ժյուպեին և սննդի, գյուղատնտեսության ու ձկնորսության նախարար Բրունո Լեմերին մեղադրել է «իրենց քթից այն կողմ չտեսնելու մեջ»:

«Կառավարությունում նախագահում է երկրի նախագահը, իսկ որոշումներն ընդունում վարչապետը»,- նշել է ԱԳ նախարարը:

Խոսելով Թուրքիայի հետ հարաբերություններից՝ Ժյուպեն հույս է հայտնել, որ ներկայիս «ցնցումները կանցնեն և այդ հարաբերությունները հետագայում էլ ավելի կամրապնդվեն»: