ԳԱՎԱՌ, 18 ՀՈՒՆՎԱՐԻ, ԱՐՄԵՆՊՐԵՍ: Անցած տարվա հոկտեմբերից սկսվել են Գավառ քաղաքի կենտրոնական հրապարակի փոփոխման եւ նորացման աշխատանքները: Դրանք, ելնելով եղանակի ցրտությունից, ժամանակավորապես ընդհատվել են եւ կշարունակվեն տաքանալուն պես: Ինչպես «Արմենպրես»-ին  տեղեկացրեց Գավառի քաղաքապետ Գուրգեն Մարտիրոսյանը, առաջիկայում Գավառ քաղաքն ունենալու է բոլորովին նոր, հետաքրքիր մտահղացումներով, գունավոր լուսային էֆեկտներով, գեղեցիկ շատրվաններով,  շքեղ ձեւավորումներով, ծաղիկներով ու դեկորատիվ ծառերով ձեւավորված հրապարակ: Ձեւափոխվելու եւ վերակառուցվելու է նաեւ Գավառի կենտրոնական հրապարակի մաս կազմող, քաղաքի հինմադրման տարեթիվը հաստատող Ուրարտուի արքա Ռուսա Առաջինի եռալեզու սեպագիր արձանագրությունը կրող հուշարձանը: Հրապարակի ձեւափոխման եւ վերակառուցման նախագծող ճարտարապետը Գավառ քաղաքի բնակիչ Ռաֆայել  Հերգնյանն է, լուսավորության ձեւավորման նախագծի հեղինակը` «Պրոլայթինգ» ընկերությունը: Քաղաքապետը հույս հայտնեց, որ հրապարակի վերակառուցման գործում անմիջական մասնակցություն կունենան արտերկրում աշխատող գավառցի գործարարները, եւ կարվի հնարավորը, որ տեղական բյուջեի  վրա այս ուղղությամբ «բեռը» ծանր չլինի: Այսօրվա դրությամբ հրապարակից հեռացվել են նախկին թփերն ու ծառերը, շարվել հրապարակը գոտեւորող եզրաքարերը: