Անհայտ պատճառներով սատկած անասունի վերաբերյալ փորձաքննության պատասխանը կլինի երեք օրից
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Դեռեւս անհայտ պատճառներով Լոռու մարզում սատկած խոշոր եղջերավոր անասունի գլուխն ուղարկվել է լաբորատորիա: Փորձաքննության պատասխանը կստացվի երեք օրից:
Այս մասին «Արմենպրես»-ի հետ զրույցում նշեց ՀՀ գյուղատնտեսության նախարարության սննդամթերքի անվտանգության պետական ծառայության հասարակայնության հետ կապերի բաժնի պետ Բաբկեն Պիպոյանը: «Նախնական զննությունը ի հայտ է բերում այն, որ անասունը չի հիվանդացել այն հիվանդություններով, որոնց դեմ Հայաստանում պետպատվերի շրջանակներում իրականացվում է պատվաստում»,- ասաց Պիպոյանը' հավելելով, որ դա կարող է լինել կատաղություն, սակայն հստակ պատասխանը կլինի միայն լաբորատոր փորձաքննությունից հետո:
Նշենք, որ ՀՀ ԱԻՆ հաղորդած տեղեկությունների համաձայն' նոյեմբերի 14-ին տեղեկություն է ստացվել, որ Լոռվա մարզի Կաթնառատ գյուղում նկատվել է խոշոր եղջերավոր անասունների հիվանդություն, որի հետեւանքով անկել է մեկ եւ հարկադիր սպանդի ենթարկվել' վեց խոշոր եղջերավոր անասուն:
Բաժանորդագրվեք մեր ալիքին Telegram-ում