Հայաստանում ԱՄՆ դեսպանի պաշտոնում Բ.Օբաման առաջադրել է Ջոն Հեֆֆերնի թեկնածությունը
ՎԱՇԻՆԳՏՈՆ, 19 ՄԱՅԻՍԻ, ԱՐՄԵՆՊՐԵՍ: Հայաստանում ԱՄՆ դեսպանի պաշտոնում ԱՄՆ նախագահ Բարաք Օբաման առաջադրել է Ջոն Հեֆֆերնի թեկնածությունը: Ինչպես հաղորդում է «Արմենպրես»-ը' վկայակոչելով Սպիտակ տան պաշտոնական կայքէջը, Ջ.Հեֆֆերնն այժմ Բրյուսելում ՆԱՏՕ-ում ԱՄՆ առաքելության ղեկավարի տեղակալն է: Մինչ այդ նշանակումը նա աշխատել է Ինդոնեզիայում ԱՄՆ դեսպանատանը:
«Ակնկալում ենք, որ ԱՄՆ Սենատում լսումների ժամանակ Հեֆֆերնը սկզբունքային դիրքորոշում կարտահայտի Հայոց ցեղասպանության հարցում եւ կամրապնդի հայ-ամերիկյան հարաբերությունները, ինչը ԱՄՆ հայ համայնքի հիմնական մտահոգությունն է»,- ասել է Հայ դատի' Վաշինգտոնի հանձնախմբի գործադիր տնօրեն Արամ Համբարյանը:
Եթե Սենատը հավանություն տա Ջոն Հեֆֆերնի թեկնածությանը, ապա նա Հայաստանում ԱՄՆ դեսպանի պաշտոնում կփոխարինի Մարի Յովանովիչին, ով այս տարվա հունիսին ավարտում է առաքելությունը: Մարի Յովանովիչը կզբաղեցնի Հյուսիսային եւ Կենտրոնական Եվրոպայի հարցերով ԱՄՆ պետքարտուղարի տեղակալի օգնականի պաշտոնը:
Բաժանորդագրվեք մեր ալիքին Telegram-ում