Podcast. Աշխատանքի տոնավաճառը համագործակցության լավագույն հարթակներից է
ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ։ Հայաստանի պետական տնտեսագիտական համալսարանը, ՀՀ աշխատանքի և սոցիալական հարցերի նախարարության Միասնական սոցիալական ծառայության հետ համատեղ արդեն երրորդ տարին է համալսարանի բակում կազմակերպում է Աշխատանքի տոնավաճառ։ Այս տարի միջոցառումը կկայանա մայիսի 5-ին, ժամը 11:00-14:00-ն ՀՊՏՀ-ի բակում։ Նախագծի մասին Podcast-ի շրջանակում զրուցել ենք տնտեսագիտական համալսարանի կարիերայի կենտրոնի պետ Տաթև Վարդանյանի հետ ։
Տոնավաճառին մասնակցելու են ինչպես պետական, այնպես էլ մասնավոր ոլորտի շուրջ 80 հայաստանյան առաջատար գործատուներ։ Այդ թվում ֆինանսների և էկոնոմիկայի նախարարությունները, բանկեր, ապահովագրական կազմակերպություններ և այլն։ Ներկաները հնարավորություն կստանան ծանոթանալու առկա թափուր հաստիքներին, կարիերայի զարգացման հնարավորություններին ու հեռանկարներին։
Հաշվի առնելով աշխատաշուկայում ինտեգրվելու ներկայիս պայմանները՝ կարերայի կենտրոնը կարևորում է նմանօրինակ աշխատանքի տոնավաճառների անցկացումը: Այն հնարավորություն է տալիս փոխշահավետ հարթակ բացելու բուհ-աշխատաշուկա փոխգործակցության մեջ:
Նմանատիպ ծրագրերի մշակումն ու իրականացումը միտված է ուսանողներին և նորավարտ շրջանավարտներին հնարավորություն ընձեռելու նախ ծանոթանալու հայաստանյան աշխատաշուկային, ինչպես նաև կողմնորոշվելու կարիերայի ընտրության և կառուցման հարցում:
Աշխատանքի տոնավաճառը այն հարթակն է, որտեղ աշխատանք առաջարկողն ու աշխատանք փնտրողը հնարավորություն են ունենում առերես հանդիպել, նախնական պայմանավորվածություն ձեռք բերել, այդ թվում նաև, հնարավորության դեպքում, հետագա համագործակցության սկիզբը դնել:
Անցյալ տարի մասնակիցների թիվը հասել է 5000-ի և կազմակերպիչները հույս ունեն, որ տարեց տարի թիվը պիտի ավելանա։
Աշխատանքի տոնավաճառը մշտապես կազմակերպվում է Աշխատանքի և սոցիալական հարցերի Միասնական սոցիալական ծառայության հետ համատեղ։ Բացի տոնավաճառից նախատեսված է նաև աշխատոժողով՝ մարդկային ռեսուրսների կառավարման մասնագետների հետ։ Քննարկվելու են աշխատաշուկայում առկա իրավիճակներն ու հետագա պլանների և զարգացման ձևաչափերի անհրաժեշտությունը։
Ըստ վիճակագրական տվյալների ամենապահանջված մասնագիտություններից են համարվում ՏՏ ոլորտի մասնագետները, հաջորդիվ տնտեսագիտական մասնագիտական որակավորում պահանջող մասնագիտությունները, հաշվապահները, մարկետոլոգները, աուդիտորները, բիզնես անալիստները և այլ մասնագիտություններ։ Տոնավաճառին մասնակցության հայտ կարող են ներկայացնել ոչ մասնագիտական կրթութամբ անձինք։ Տոնավաճառը բաց է բոլոր աշխատանք փնտրողների համար, կարող են դիմել ինչպես մայրաքաղաքից, այնպես էլ մարզերից։ Տարիքային սահմանափակում նույնպես չկա, թափուր հաստիքները բազմապրոֆիլ են՝ մաքրուհուց մինչև բժիշկ և խոհարար, ուսանողները ևս կարող են մասնակցել։
Զրույցը ամբողջությամբ լսեք Armenpress-Podcast-ում։
Տաթև Զաքարյան
Բաժանորդագրվեք մեր ալիքին Telegram-ում