ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանն այցելել է Հունաստանի Ազգային գրադարան և հանդիպել գրադարանի տնօրեն Ստավրոս Զումբուլակիսին: «Արմենպրես»-ի հաղորդմամբ՝ Հունաստանում Հայաստանի դեսպանությունը տեղեկացնում է, որ դեսպան Մկրտչյանը գրադարանի նախագահի ուղեկցությամբ շրջել է գրադարանում, ծանոթացել այնտեղ պահվող գրականությանը, հրատարակություններին, բացառիկ գրքերին, ինչպես նաև էլեկտրոնային եղանակով ընթերցողների սպասարկման կազմակերպման գործընթացին:

Հանդիպման ընթացքում զրուցակիցներն ընդգծել են միջգրադարանային համագործակցության, շփումների, փոխայցելությունների և փորձի փոխանակման կարևորությունը` միջմշակութային և կրթական կապերի ամրապնդման և զարգացման գործում: Կողմերը քննարկել են համատեղ միջոցառումներ անցկացնելու հեռանկարները։

Դեսպան Մկրտչյանը Հունաստանի Ազգային գրադարանին մի շարք գրքեր է նվիրել` Հայոց ցեղասպանության պատմության, հայ ժողովրդի պատմության և մշակույթի վերաբերյալ` հույս հայտնելով, որ գրականությունն իր արժանի տեղը կզբաղեցնի Հունաստանի Ազգային գրադարանում: