«Սպուտնիկ-V» պատվաստանյութի մատակարարումը Հայաստան մոտենում է գործնական փուլին. ՌԴ դեսպան

ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: Հայաստանում Ռուսաստանի Դաշնության դեսպան Սերգեյ Կոպիրկինը հույս ունի, որ շատ շուտով ռուսական «Սպուտնիկ-V» պատվաստանյութը կմատակարարվի Հայաստան: Ինչպես տեղեկացնում է «Արմենպրես»-ը, մարտի 26-ին լրագրողների հետ զրույցում Կոպիրկինը ընդգծեց, որ այս հարցի ուղղությամբ շատ ակտիվ աշխատանք է տարվում։

«Այն մոտենում է գործնական իրագործման փուլին։ Հույս ունեմ, որ բավականին արագ, մոտ ժամանակներում հնարավոր կլինի իրականացնել մատակարարումները։ Համենայնդեպս, մենք՝ որպես դեսպանություն, ամեն կերպ աջակցում ենք դրան», - ասաց դեսպանը:

Ինչ վերաբերում է պատվաստանյութը Հայաստանում արտադրելու հնարավորություններին, դեսպանն ասաց, որ այդ հարցի շուրջ համագործակցում են ՀՀ առողջապահության նախարարությունը և ռուսական ներդրողները:

«Այս առումով որևէ հստակ տեղեկատվություն չունեմ, բայց գիտեմ, որ այս թեման իսկապես շատ ակտիվ քննարկվում է և հույս ունեմ, որ շատ շուտով պատվաստանյութը կհասնի Հայաստան», - եզրափակեց Կոպիրկինը:

Հայաստանում կորոնավիրուսի դեմ պայքարին միացած բուժկենտրոնների բուժաշխատողների շրջանում կամավորության սկզբունքով կորոնավիրուսի դեմ պատվաստում է իրականացվում Ռուսաստանի նվիրած Սպուտնիկ-V պատվաստանյութերով: Վերջին տվյալներով՝ մոտ 600 բուժաշխատողներ և ռիսկի խմբի քաղաքացիներ ստացել են պատվաստում: Հայաստանը Ռուսաստանի հետ երկկողմ աշխատանքների արդյունքում նախատեսում է առաջիկայում գնել Սպուտնիկ-V պատվաստանյութ, զուգահեռ աշխատանքներ է տանում պատվաստանյութ ձեռք բերելու Covax հարթակի միջոցով: