ԵՐԵՎԱՆ, 8 ՄԱՐՏԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանի հրաժարականի պահանջով բողոքի ակցիաներ անցկացնող «Հայրենիքի փրկության շարժման» ներկայացուցիչները չեն պատրաստվում ազատել Բաղրամյան պողոտան: «Արմենպրես»-ի փոխանցմամբ՝ այս մասին լրագրողների հետ զրույցում ասաց շարժման անդամ, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը:

«Մենք հետևողականորեն գնում ենք առաջ: Վաղը ըստ իրավիճակի կորոշենք մեր քայլերը և կգնանք այդ ուղղությամբ: Ակնհայտ է, որ այս պողոտան չի ազատվելու, մեր գործողություններում նահանջ չի լինելու»,- ասաց Սաղաթելյանը:

Շարժման անդամը նշեց, որ արտահերթ ընտրությունների անցկացման վերաբերյալ վարչապետի հետ հանդիպում և քննարկում չեն նախատեսում:

«Հայրենիքի փրկության շարժման» աջակիցները Բաղրամյան պողոտայից շարժվեցին դեպի «Եռաբլուր» զինվորական պանթեոն՝ Կանանց իրավունքների պաշտպանության միջազգային օրը որդեկորույս մայրերի և եղբայրներին ու ամուսիններին կորցրած կանանց կողքին լինելու համար: