Ժամանակը Երևանում՝ 11:07:36,   8 Մայիս

Փոխնախարարը հույս ունի, որ հնարավոր երկաթգծի շահագործմամբ գյուղմթերքն ավելի մրցունակ կդառնա արտահանվող շուկայում

Փոխնախարարը հույս ունի, որ հնարավոր երկաթգծի շահագործմամբ գյուղմթերքն 
ավելի մրցունակ կդառնա արտահանվող շուկայում

ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: ՀՀ էկոնոմիկայի փոխնախարար Արման Խոջոյանի կարծիքով՝ դեպի Ռուսաստան, Իրան հնարավոր երկաթուղային հաղորդակցության դեպքում Հայաստանից արտահանվող գյուղմթերքն ավելի մրցունակ գներով հասանելի կլինի արտահանվող շուկայում, թարմ գյուղմթերքն ավելի շուտ կհասնի արտահանվող շուկա: Խոջոյանը նման տեսակետ հայտնեց՝ ի պատասխան «Արմենպրես»-ի հարցի՝ տարածաշրջանում տնտեսական, տրանսպորտային կապերի ապաշրջափակման դեպքում հնարավոր երկաթգծի շահագործումը ինչպե՞ս կանդրադառնա հատկապես գյուղմթերքի արտահանման վրա: 

«Արձանագրված ամենամեծ խնդիրներից մեկը հենց ճանապարհներն են, հասանելիությունն է: Եվ արտահանման համար շատ կարևոր է, որ քո ապրանքը ժամանակին և ցանկալի ժամկետում հասնի թիրախավորված շուկա»,-ասաց փոխնախարարաը:

Խոջոյանը շեշտեց, որ թարմ գյուղմթերքի արտահանման դեպքում կարևոր է արագությունը, թարմությունը: Բացի այդ, նա նշեց, որ գյուղմթերքի գինը շատ արագ է փոխվում, սեզոնի սկզբին, երբ դեռ քիչ է քանակը, գյուղմթերքի գինը շատ բարձր է, և արտադրողների նպատակն է հենց այդ ժամանակ մուտք գործել այդ շուկաներ: «Եվ մի փոքր ուշացումը, Լարսի անցակետում անհասկանալի խնդիրները մեծ տնտեսական կորուստների են բերում տնտեսավարողների համար: Նաև նոր բեռներ չեն ընկնում ճանապարհ՝ դեպի այլ շուկաներ, որովհետև մտածում են, որ անցակետում խնդիր կա, և բերքահավաքը սկսում է դանդաղել»,-ասաց Խոջոյանը: 

Անդրադառնալով հարցին, թե հնարավոր երկաթգծի շահագործումը ինչքանո՞վ կօգնի այս հարցին՝ նա ասաց, որ երկաթգիծն այն տրանսպորտային միջոցներից է, որի դեպքում կարելի է նմանատիպ խնդիրները թողնել անցյալում: «Այն ճանապարհածախսի կրճատման առումով հնարավորություն կտա ավելի մրցունակ գներով հասանելի լինել արտահանվող շուկաներում»,-ասաց փոխնախարարը:

Նրա խոսքով՝ իր գործընկերները ներկայում զբաղվում են տնտեսական գնահատականների, վերլուծությունների հարցով, ամբողջական գնահատականը, պատկերը պարզ կլինի աշխատանքների ավարտին:

Հայաստանի Հանրապետության վարչապետի, Ռուսաստանի Դաշնության և Ադրբեջանի նախագահների՝ նոյեմբերի 9-ին ստորագրված հայտարարության 9-րդ կետով նշվում էէ որ տարածաշրջանում բոլոր տնտեսական և տրանսպորտային կապերն ապաշրջափակվում են

2021-ի հունվարի 11-ին եռակողմ հանդիպման արդյունքներով ընդունված հայտարարությամբ էլ նշվում է, որ նոյեմբերի 9-ի հայտարարության  9-րդ կետի իրականացման նպատակով Հայաստանի Հանրապետության, Ռուսաստանի Դաշնության և Ադրբեջանի Հանրապետության փոխվարչապետների համատեղ նախագահությամբ եռակողմ աշխատանքային խումբ է ստեղծվում, որն իր առաջին հանդիպումը կանցկացնի մինչև 2021 թ.-ի հունվարի 30-ը: Դրա արդյունքների հիման վրա կկազմի Հայտարարության 9-րդ կետի կիրառումից բխող աշխատանքների հիմնական ուղղությունների ցանկը՝ որպես գերակայություններ ընդունելով երկաթուղային և ճանապարհային հաղորդակցությունները, ինչպես նաև կսահմանի Ադրբեջանի Հանրապետության, Հայաստանի Հանրապետության ու Ռուսաստանի Դաշնության միջև համաձայնեցված այլ ուղղություններ:

 «Կոմերսանտ» պարբերականը հրապարակել էր Հայաստանը և Ադրբեջանը կապող երկաթուղային հաղորդակցության քարտեզ: Ըստ այդ քարտեզի՝ երկաթգծերից մեկը սկիզբ կառնի Երևանից և Նախիջևանի Ինքնավար Հանրապետությունով կշարունակվի դեպի Իրանի Իսլամական Հանրապետություն, մյուս երկաթգիծը կսկսվի Թուրքիայի Իգդիր քաղաքից և կձգվի Նախիջևանի Ինքնավար Հանրապետություն, Ադրբեջան, Ռուսաստան երթուղիով, իսկ երրորդը կմիավորի Երևանը, Նախիջևանը, Ադրբեջանն ու Ռուսաստանի Դաշնությունը:

Սակայն ՀՀ փոխվարչապետ, նշյալ աշխատանքային խմբի հայկական կողմի համակարգող  Մհեր Գրիգորյանը հունվարի 20-ին, լրատվամիջոցի հրապարակած քարտեզի առնչությամբ, հայտնել էր, որ նման քննարկում չի եղել, սակայն ռուսական կողմի հետ մտքեր փոխանակվել են: Այս պահին որևէ ելակետային օրակարգ գոյություն չունի, քննարկումները նոր սկսելու են՝ այդ թվում թե ուղիների, թե ենթակառուցվածքների մասով:








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ