Բանակի թիկունքն ամուր պահելու համար համապատասխան հանձնարարականները տրված են. ՀՀ վարչապետ
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի անվտանգության խորհրդի նիստի ընթացքում տրվել են համապատասխան հանձնարարություններ՝ երկրի բնականոն գործունեությունն ու բանակի ամուր թիկունքն ապահովելու համար: «Արմենպրես»-ի փոխանցմամբ՝ Ազգային ժողովի հատուկ նիստում այս մասին ասաց ՀՀ վարչապետ Նիկոլ Փաշինյանը՝ պատասխանելով «Լուսավոր Հայաստան» խմբակցության պատգամավոր Արկադի Խաչատրյանի հարցին:
«Տեղի է ունեցել անվտանգության խորհրդի նիստ, և տրվել են համապատասխան հանձնարարականներ, այդ թվում՝ տնտեսական ուղղություններով, որպեսզի մենք ապահովենք մեր երկրի բնականոն գործունեությունը և բանակի ամուր թիկունքը: Եվ տնտեսական մասով, և հոգեբանական մասով, և տեղեկատվական մասով մենք անելիքներ ունենք: Միջազգային հանրությունը սկսել է արձագանքել, այդ արձագանքները չեզոք են, բացի Թուրքիայի արձագանքից, որն ակնհայտորեն լարում է իրավիճակը և իրավիճակի մեջ ներգրավվելու հայտեր է ներկայացնում, եթե չասենք, որ ներգրավված է իրավիճակի մեջ: Եվ մենք պետք է այս տեղեկատվությունը նույնպես միջազգային հանրությանը ճիշտ ներկայացնենք, թե ինչ է կատարվում, մանավանդ մեծ՝ տարածաշրջանային կոնտեքստում»,- ասաց ՀՀ վարչապետը:
Բաժանորդագրվեք մեր ալիքին Telegram-ում