ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի աթլետիկայի ֆեդերացիայի նախագահ Ռոբերտ Էմմիյանը գոհ է հայ մարզիկների` Բալկանյան երկրների առաջնության մասնակցությունից:

«Մեր թիմը հրաշալի մասնակցություն ունեցավ Բալկանյան երկրների առաջնությունում` նվաճելով երեք ոսկե մեդալ` այն էլ Հայաստանի անկախության օրը: Շնորհավորում եմ բոլորիս»,-«Արմենպրես»-ի հաղորդմամբ` ասել է Էմմիյանը:

Ավելի վաղ հայտնի էր դարձել, որ  Հայաստանի աթլետիկայի հավաքականի անդամները դարձել են Բալկանյան երկրների առաջնության չեմպիոններ: Ռումինական Կլուժ-Նապոկա քաղաքում կայացած Բալկանյան երկրների առաջնությունում եռացատկորդ Լևոն Աղասյանը  16.53 մետր արդյունքով դարձել է եռացատկի մրցաշարի հաղթող, իսկ ահա միջին տարածությունների վազորդ Երվանդ Մկրտչյանը 1500 և 3000 մետր տարածությունները հաղթահարել է համապատասխանաբար3:47.60 և 8:12.02 ժամանակում: Նա երկու ոսկե մեդալ է նվաճել: 

Իսկ հավաքականում նորեկ արագավազորդ Ալեքս Դոնիկյանը 100 մետր տարածությունը հաղթահարել է 10.44 վայրկյան արդյունքում: Այս արդյունքը համարվում է Հայաստանի ռեկորդ: