«Ռուսական կենտրոն»-ն իր դռները բացեց Իսահակյանի գրադարանի մասնաճյուղում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: Ռուսերենի անվճար դասընթացներ, ռուս գեղարվեստական և մասնագիտական գրականություն, կրթական նյութեր, տեղեկատվական մեծ շտեմարաններ. այս ամենը հնարավոր է գտնել Ավ. Իսահակյանի անվան կենտրոնական գրադարանի մասնաճյուղի «Ռուսական կենտրոն»-ում, որի բացման հանդիսավոր արարողությունը տեղի ունեցավ սեպտեմբերի 18-ին:
«Արմենպրես»-ի հաղորդմամբ` «Ռուսական կենտրոն»-ը բացվել է «Դոմ Մոսկվի» մոսկովյան մշակութագործարարական կենտրոնի և Ավետիք Իսահակյանի անվան կենտրոնական գրադարանի գործակցությամբ՝ Երևանի Քաղաքապետարանի աջակցությամբ։
«Թվում էր, թե Հայաստանում Ռուսաստանի մասին ամեն ինչ գիտեն, բայց իրականում այդպես չէ: Աշխարհը փոխվում է, մեր երկրներն են փոխվում և շատ կարևոր է, որ երկու երկրների քաղաքացիները, հատկապես երիտասարդությունը, պարբերաբար թարմացված տեղեկատվություն ստանան այն մասին, թե ինչ է տեղի ունենում Ռուսաստանում և Հայաստանում, որ նրանք ծանոթանան մեր երկրենրի մշակութային, հոգևոր, հասարակական կյանքին: Էական է, որ մեր հարաբերությունները պահպանեն այն դինամիկան, որը մշտապես եղել է: Մեր հարաբերությունները ամուր արմատներ ունեն, բայց պետք է աշխատել դրանք պահպանել և զարգավնել»,-նշեց ՀՀ-ում ՌԴ արտակարգ և լիազոր դեսպան Սերգեյ Կոպիրկինը` հաջողություն մաղթելով կենտրոնին:
Երևանում «Դոմ Մոսկվի» գլխավոր տնօրեն Վահրամ Կարապետյանն էլ ընդգծեց, որ բոլոր գրադարաններում գրեթե ամեն ինչ կա, սակայն «Ռուսական կենտրոն»-ում գերիշխելու է ռուս գրականությունը, անցկացվելու են ռուսերենի անվճար դասընթացներ: «Կենտրոնում ներկայացված է կրթական նյութերի մեծ բազմազանություն, որի միջոցով քաղաքացիները կարող են ճշգրիտ և բաց տեղեկատվություն ստանալ Ռուսաստանի մասին ամենատարբեր ոլորտներում, ինչպես նաև բարելավվել ռուսերենի մակարդակը։ Սա ևս մեկ քայլ է ամրապնդելու Մոսկվայի կառավարության և Երևանի քաղաքապետարանի միջև գործակցությունը և երկու ժողովուրդների միջև մշակութային երկխոսությունը»,-ասաց Կարապետյանը։
«Ռուսական կենտրոնը»-ի ընթերցողներն ու այցելուները կարող են ծանոթանալ Ռուսաստանի մասին կրթաճանաչողական և տեսալսողական նյութերին, հասանելի է գեղարվեստական և մասնագիտական գրականության հարուստ հավաքածու, պաշտոնական հրատարակություններ, տեղեկատուներ, էլեկտրոնային գրքեր և ամսագրեր, որոնք տեղադրված են նաև օնլայն հարթակում։ Կենտրոնը հագեցած է համապատասխան տեխնիկայով, որը տարբեր ձևաչափերով հասանելի է դարձնում Ռուսաստանի պատմամշակութային և գրական ժառանգությունը լայն շրջանակների համար։
«Ժամանակները փոխվել են և գրադարանի դերը ևս փոխվել է։ Այն պարզապես գիրք ու գրականություն տրամադրող կառույց չէ։ Մեր քաղաքացիների համար այն դարձել է հանրային հարթակ, ուր հատվում են տարբեր ազգերի մշակույթները, հարթակ, որը նպաստում է քաղաքացու կրթամշակութային դաստիարակությանը, գեղագիտական ճաշակի ձևավորմանը, յուրօրինակ հանդիպումների, հանգստի և ժամանցի վայր է»,-շեշտեց Ավ. Իսահակյանի անվան կենտրոնական գրադարանի տնօրեն Հասմիկ Կարապետյանը։
«Ռուսական կենտրոնում» կազմակերպվելու են հանրային դասախոսություններ, սեմինարներ, տարբեր հանդիպումներ, ֆիլմերի ցուցադրություններ, խոսակցական ակումբներ։
Բաժանորդագրվեք մեր ալիքին Telegram-ում