Հաշվեքննիչ պալատի նախագահը ներկայացրեց պետբյուջեի կատարման գործընթացում նկատած խնդիրները
ԵՐԵՎԱՆ, 5 ՀՈՒՆԻՍԻ, ԱՐՄԵՆՊՐԵՍ: Հաշվեքննիչ պալատը 2019 թվականի պետական բյուջեի կատարման գործընթացում նկատում է որոշ խնդիրներ, միևնույն ժամանակ՝ արձանագրում դրական տեղաշարժերը: «Արմենպրես»-ի փոխանցմամբ՝ այս մասին հայտնեց ՀՀ Հաշվեքննիչ պալատի նախագահ Լևոն Յոլյանը՝ ԱԺ-ում ներկայացնելով «Հայաստանի Հանրապետության 2019 թ. պետական բյուջեի կատարման մասին» տարեկան նախնական հաշվետվության վերաբերյալ պալատի եզրակացությունը:
Ըստ պալատի՝ պետական բյուջեի կատարման գործընթացում առկա են մի շարք խնդիրներ, որոնք չեն բխում հանրային հաշվետվողականության ապահովման լավագույն սպասումներից: «Այդ իսկ պատճառով հաշվեքննիչ պալատն առաջակում է Պետական բյուջեի մասին ամենամյա օրենքում, ինչպես նաև տարեկան հաշվետություններում ներառել ըստ եկամտատեսակների հարկային եկամուտների պլանավորած ցուցանիշները: 2014 թվականից մինչև այժմ պետական բյուջեի կատարման մասին հաշվետվություններում ռեզիդենտների կողմից ձեռք բերված արտարժութային պետական պարտատոմսերի համար վճարված տոկոսավճարները ներառված չեն ներքին տոկոսավճար հոդվածում»,-ասաց Յոլյանը:
Պետական պարտքի կառավարման 10 ուղղություններով պալատն արձանագրել է 37 խնդիր, դրանց շտկման ուղղությամբ տվել 44 առաջարկություն: Յոլյանը նաև նկատեց, վերջին 1 տարվա ընթացքում տեղի են ունեցել մի շարք դրական տեղաշարժեր Հաշվեքննիչ պալատի կողմից նախկինում ներկայացված առաջարկությունների կատարման գործընթացում: Օրինակ արտաբյուջետային միջոցները 2019-ին արդեն իսկ ներառվել են ՀՀ պետական բյուջեի մասին օրենքում: Հաշվի առնելով եզրակացությամբ ներկայացված նկատառումներն ու փաստերը՝ պալատը 2019 թվականի պետական բյուջեի կատարման վերաբերյալ տալիս է դրական եզրահանգում:
Աննա Գրիգորյան
Բաժանորդագրվեք մեր ալիքին Telegram-ում