Փոխոստիկանապետը արտակարգ դրության օրերին հանցագործությունների թվի նվազում է նկատում
ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ։ Հայաստանում օպերատիվ իրավիճակը գտնվում է ոստիկանության լիարժեք վերահսկողության ներքո։ Ապրիլի 6-ի մամուլի ասուլիսի ժամանակ այս մասին ասաց փոխոստիկանապետ Հայկ Մհրյանը, պատասխանելով «Արմենպրես»-ի հարցին, թե ինչպիսին է Հայաստանում հանցավորության վիճակը արտակարգ դրության օրերին՝ հաշվի առնելով այն, որ ոստիկանությունը ողջ ուժերը կենտրոնացրել է կորոնավիրուսի դեմ պայքարի շրջանակներում իրականացվող միջոցառումներին։
«Չնայած, որ Հայաստանի Հանրապետության ոստիկանությունը էական գործառույթներ է իրականացնում կորոնավիրուսի համաճարակի կանխարգելման միջոցառումների շրջանակում, բայց, այնուամենայնիվ, օպերատիվ իրավիճակը գտնվում է լիարժեք վերահսկողության ներքո։ Բոլոր առումներով խնդիրները կատարվում են ոստիկանության կողմից։ Այո, հանցագործությունների էական նվազում կա»,- եզրափակեց Մհրյանը։
Հայաստանում ապրիլի 6-ի՝ ժամը 11:00-ի դրությամբ կորոնավիրուսի հաստատված դեպքերի ընդհանուր թիվը 833 է, արձանագրվել է մահվան 8 դեպք: Ապաքինվածների թիվը 62 է:
ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն: Երկրում գործում է խիստ սահմանափակումների ռեժիմ։
Բաժանորդագրվեք մեր ալիքին Telegram-ում