ԵՐԵՎԱՆ, 7 ՄԱՐՏԻ, ԱՐՄԵՆՊՐԵՍ: Ալեքսանդր Սպենդիարյանի տուն-թանգարանում մարտի 7-ին կայացավ «Հատընտիր արիաներ Բարոկկո դարաշրջանից» խորագրով համերգային երեկոն՝ նվիրված Կանանց միջազգային օրվան: Ինչպես տեղեկացնում է «Արմենպրես»-ը, միջոցառման ընթացքում  հանդես եկավ «Վերածնունդ» միջազգային մրցույթ-փառատոնի 1-ին կարգի մրցանակակիր մեներգիչ Ալեքսան Խաչատրյանը (բաս), ում  նվագակցեց Լևոն Հարությունյանը:

Ալեքսան Խաչատրյանը կատարեց Բարոկկո ժամանակաշրջանի երգերը,  3 հոգևոր արիա (Բախ, Հենդել, Դորանտե), ինչպես նաև 14 աշխարհիկ (Մարտինի, Դորանտե, Սկարլատի, Կալլդարա, Բենեդիկտ Մարչելո, Պերգոլեզի, Գլյուկ, Ջորդանի) երգեր:

«Բարոկկո դարաշրջանը հայտնի է գեղեցիկ, վեհ ու ազնվական զգացմունքների արտասովոր ու հանճարեղ մեկնաբանությամբ: Այսպիսի երաժշտությունը հասնում է յուրաքանչյուրի հոգուն ու սրտին: Վստահ եմ՝ այն հիանալի նվեր կլինի գարնանային գեղեցիկ տոների կապակցությամբ»,- ընդգծեց Ալեքսան Խաչատրյանը:

Մեներգչի կարծիքով` երգեցողության տեսանկյունից այսպիսի երգերը երգչին շատ բան են փոխանցում և պատահական չէ,  որ բարոկկո շրջանի երգեր կատարել են այնպիսի երգիչներ, ինչպիսիք են Պավարոտին, Խվարաստովսկին, Ֆիշեր Դիսկաուն, Ջիլին, Կառուզոն և այլք:

«Այս երգերն, իրենց մեջ կրելով ազնվականություն և վեհություն, այդ ամենը փոխանցում են երգչի ձայնին և վոկալին: Երգիչն էլ՝ իր հանդիսատեսին»,- շեշտեց Խաչատրյանը:

Մարտի 7-ը նաև Ալեքսան Խաչատրյանի ծննդյան օրն է: Մեներգչի համար իր ծննդյան օրը սիրելի մաեստրո Լևոն Հարությունյանի հետ մենահամերգով հանդես գալը մեծ պատիվ է:

Խաչատրյանը շատ ուրախ է, որ կարողացավ բարոկկո ժամանակաշրջանի վեհությունն ու ազնվականությունը փոխանցել կանանց ու աղջիկներին և թողնել այդ զգացումը նրանց հոգում: