ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: Հայկական բանակը կատարելագործվում է՝ ընդլայնելով իր հնարավորությունները: «Արմենպրես»-ի հաղորդմամբ՝ այս մասին լրագրողների հետ ճեպազրույցում նշել է ՀՀ ոստիկանության պետի պաշտոնակատար Արման Սարգսյանը՝ շնորհավորելով հայկական բանակի կազմավորման տարեդարձը:

«Բոլորի աչքի առջև, օր օրի հայկական բանակը ընդլայնվում ու կատարելագործվում է: Այն մեր անվտանգության թիվ մեկ երաշխավորն է: Այստեղ պետք է նաև ընդգծել, որ հայկական բանակն իր հզորության հաշվին երաշխավորում է նաև տարածաշրջանում խաղաղությունը: Շնորհավորում եմ հայկական բանակի տոնի առթիվ, նորանոր ձեռքբերումներ, նոր փոփոխությունների, զարգացումների հնարավորություններ եմ մաղթում »,-ասաց Արման Սարգսյանը:

Հունվարի 28-ը Հայկական բանակի կազմավորման տարեդարձն է: Հայկական բանակը հայ ժողովրդի անվտանգության միակ ու հաստատուն երաշխավորն է: Հայոց բանակի կազմավորման բեկումնային տարիները 1992-1994 թվականներն էին, երբ արդեն անկախ Հայաստանի Հանապետությունը և Լեռնային Ղարաբաղի Հանրապետությունը, գտնվելով չհայտարարված, բայց փաստացի պատերազմի մեջ Ադրբեջանի հետ, միաժամանակ ձեռնամուխ եղան նաև ազգային բանակի ստեղծմանը: