ԵԱՀԿ Մինսկի խումբը ցանկանում է Հայաստանի եւ Ադրբեջանի նախագահների նոր հանդիպում կազմակերպել
ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ: ԵԱՀԿ Մինսկի խումբը կապ է պահպանում Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի հետ ԼՂ հակամարտության կարգավորման հաջորդ հանդիպման կազմակերպման շուրջ: Այդ մասին, ինչպես տեղեկացնում Է «Արմենպրես»-ը, օգոստոսի 16-ին ՌԻԱ Նովոստիին հայտարարել Է ԵԱՀԿ-ի Մինսկի խմբի ամերիկացի համանախագահ Ջեյմս Ուորլիքը:
Հայաստանի եւ Ադրբեջանի նախագահների վերջին հանդիպումը հունիսի 20-ին տեղի Է ունեցել Սանկտ Պետերբուրգում եռակողմ ձեւաչափով՝ ՌԴ նախագահ Վլադիմիր Պուտինի մասնակցությամբ: Ավելի վաղ Սարգսյանը եւ Ալիեւը մայիսի 16-ին հանդիպել են Վիեննայում:
«Վիեննայում եւ Սանկտ Պետերբուրգում հանդիպումների ժամանակ Ադրբեջանի եւ Հայաստանի նախագահները հաստատեցին հաջորդ հանդիպումն անցկացնելու պատրաստակամությունը՝ բանակցային գործընթացի առաջխաղացումն ապահովելու նպատակով: Մենք շարունակում ենք նախագահների միջեւ հաջորդ հանդիպման կազմակերպման հնարավորությունների որոնումը եւ կապ ենք պահպանում Հայաստանի ու Ադրբեջանի նախագահների եւ արտաքին գործերի նախարարների հետ՝ հանդիպման կազմակերպման ընթացիկ առաջարկությունները քննարկելու համար»,-հայտարարել Է Ուորլիքը:
Նա նաեւ ողջունել Է որպես ԼՂ հակամարտության լուծման երաշխավոր հանդես գալու Ռուսաստանի առաջարկը:
«Մենք ողջունում ենք ՌԴ նախագահ Վլադիմիր Պուտինի անձնական մասնակցությունը այն ջանքերին, որոնք նպատակամղված են Լեռնային Ղարաբաղի հակամարտության կայուն լուծման հասնելուն»,-ասել Է Մինսկի խմբի ամերիկացի համանախագահը:
Օգոստոսի 10-ին Վլադիմիր Պուտինը Մոսկվայում ՀՀ նախագահ Սերժ Սարգսյանի հետ կայացած բանակցություններից հետո հայտարարել Էր, որ Հայաստանը եւ Ադրբեջանն իրապես ցանկանում են ելք գտնել ղարաբաղյան ճգնաժամից: «Ռուսաստանը, ինչպես նաեւ Մինսկի խմբի մի քանի այլ երկրներ կարող են հանդես գալ որպես ղարաբաղյան հակամարտության լուծման երաշխավոր»,-ասել Է նա:
Բաժանորդագրվեք մեր ալիքին Telegram-ում