Համահայկական խաղերի առթիվ Նախագահի նստավայրում տեղի է ունեցել պարգևատրման արարողություն
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: Նախագահ Սերժ Սարգսյանն օգոստոսի 3-ին ընդունել է Համահայկական ամառային վեցերորդ խաղերի կազմակերպիչներին, հովանավորներին և պատվավոր հյուրերին: Ինչպես «Արմենպրես»-ին տեղեկացրին ՀՀ նախագահի աշխատակազմի հասարակայնության եւ տեղեկատվության միջոցների հետ կապերի վարչությունից, Նախագահի նստավայրում ի պատիվ հյուրերի կայացած ընդունելությունից առաջ տեղի է ունեցել պարգևատրման արարողություն:
Համահայկական վեցերորդ խաղերի կազմակերպման գործում ներդրած նշանակալի ավանդի համար Հանրապետության Նախագահի հրամանագրերով մի խումբ անձինք պարգևատրվել են Երախտագիտության մեդալով: Նախագահի կարգադրությամբ մի խումբ անձինք էլ պարգևատրվել են Հայաստանի Հանրապետության Նախագահի շնորհակալագրով՝ համահայկական վեցերորդ խաղերի նախապատրաստման և անցկացման աշխատանքներում ունեցած գործուն մասնակցության համար:
Բաժանորդագրվեք մեր ալիքին Telegram-ում