Ծիրանի այսպիսի բերք վերջին 40 տարում չէի տեսել. գյուղատնտեսության փոխնախարարը հիացած էր
ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: Գյուղատնտեսական այս տարում ծիրանի և խաղողի բերքատվությունը զարմացրել է ոլորտի պատասխանատուներին: Լրագրողների հետ հանդիպման ժամանակ ՀՀ գյուղատնտեսության նախարարի տեղակալ Սամվել Գալստյանը հայտարարեց, որ այս տարի հիանալի բերք է սպասվում:
«Ժամանակից առաջ չընկնենք, սակայն պետք է ասեմ, որ պտղի արտադրության ծավալները կգերազանցեն նախորդ տարիների արդյունքը: Գյուղատնտեսության ոլորտում 40 տարվա աշխատանքի ընթացքում այսպիսի ծիրանի բերք դեռ չէի տեսել: Հիանալի բերք էր Արմավիրի մարզում»,- «Արմենպրես»-ի փոխանցմամբ` ասաց Գալստյանը:
Փոխնախարարի խոսքվ` խաղողի արտադրության ծավալների ավելացումը ևս ոգևորիչ է: Չնայած նախորդ տարի Արմավիրի մարզում հայտնաբերվել էր խաղողի վազի ֆիլոքսերա հիվանդությունը, փոխնախարար Գալստյանը նշում է, որ արդեն իսկ կատարվել են վարակի տարածումը կանխող բոլոր աշխատանքները: «Շուրջ 10 հեկտարի վրա արձանագրվել էր ֆիլոքսերա հիվանդությունը: Այդ այգիների քանդման աշխատանքները իրականացվել են, իսկ հողօգտագործողներին յուրաքանչյուր հեկտարի դիմաց տրվել է 3 մլն 180 հազար դրամի օժանդակություն»,- ասաց նա:
Սամվել Գալստյանը տեղեկացրեց, որ այս տարի ուսումնասիրություններ կարվեն և միջոցառումներ կձեռնարկվեն Արմավիրի, Արարատի, Վայոց Ձորի և Արագածոտնի մարզերում, որպեսզի ֆիլոքսերա հիվանդությունը տարածում չգտնի:
Բաժանորդագրվեք մեր ալիքին Telegram-ում