ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: Մեծի Տանն Կիլիկիո Ն.Ս.Օ.Տ.Տ. Արամ Ա Կաթողիկոսն ապրիլի 1-ին ընդունել է Լիբանանում Կիպրոսի դեսպան Հոմեր Մավրոմատիսին: Վեհափառ Հայրապետի և դեսպանի հանդիպման ընթացքում քննարկվել են Լիբանանի ներքին իրավիճակը, ինչպես նաև Միջին Արևելքում տեղի ունեցող իրադարձությունները: Այս մասին «Արմենպրես»-ը տեղեկացավ Մեծի Տանն Կիլիկիո Կաթողիկոսության պաշտոնական կայքից: Նորին Սրբությունն անդրադարձել է Հայոց Ցեղասպանության 100-րդ տարելիցի առիթով Հայաստանում, Լիբանանում և սփյուռքի տարբեր գաղութներում կազմակերպվող գլխավոր միջոցառումներին:

Հոմեր Մավրոմատիսը Վեհափառ Հայրապետին է փոխանցել հայ ժողովրդի արդար դատի հարցում իր կառավարության զորակցությունը և հայտնել, որ Կիպրոսի կառավարությունն ակտիվորեն կմասնակցի տարելիցին առնչվող նախաձեռնություններին: