Քաղաքաշինության նախարարությունն ու «Հաբիթաթ ֆոր Հյումենիթի Արմենիա»-ն համաձայնագիր են ստորագրել
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: ՀՀ քաղաքաշինության նախարարության և Հ«աբիթաթ ֆոր Հյումենիթի Արմենիա» հիմնադրամի միջև երկարամյա փոխշահավետ համագործակցությունն ամրապնդելու և ընդլայնելու նպատակով, այսօր` մարտի 13-ին, նախարարի տեղակալ Արմեն Ղուլարյանը և հիմնադրամի ղեկավար պարոն Գրեգ Ֆոստերը ստորագրել են համագործակցության համաձայնագիր: Ինչպես «Արմենպրես»-ին տեղեկացրին ՀՀ քաղաքաշինության նախարարության տեղեկատվության եւ հասարակայնության հետ կապերի բաժնից, ՀՖՀԱ հիմնադրամի նպատակն է նպաստել Հայաստանում բնակարանային աղքատության վերացմանը, բազմաբնակարան շենքերի կառավարման մարմինների կարողությունների զարգացմանը, ՀՀ բազմաբնակարան շենքերի ընդհանուր օգտագործման տարածքների վերանորոգմանն ու էներգաարդյունավետության բարձրացմանը:
Ողջունելով հյուրերին` նախարարի տեղակալ Արմեն Ղուլարյանը նշել է, որ ստորագրվող համաձայնագիրն էլ ավելի կնպաստի երկուստեք փոխշահավետ գործունեություն ծավալելուն: Նա նշել է, որ ՀՀ անկախության հռչակումից հետո բազմաթիվ այլ հիմնախնդիրների շարքում կառավարության առջև ծառացել են նաև անօթևան ընտանիքների բնակարանային ապահովման և բնակարանային ֆոնդի անվտանգ շահագործման խնդիրները: Դրանք հիմնականում պայմանավորված են եղել մի քանի գործոններով՝ 1988 թվականի աղետալի երկրաշարժի հետևանքների վերացմամբ, Ադրբեջանից փախստականների ներհոսքով, սողանքային երևույթների անվտանգության ապահովման անհրաժեշտությամբ և այլն:
Արմեն Ղուլարյանն իր խոսքում նշել է, որ նախարարությունը բարձր է գնահատում կառուցողական գործընկերային այն մթնոլորտը, որն առկա է նախարարության և «Հաբիթաթ ֆոր Հյումենիթի Արմենիա» հիմնադրամի միջև: Փոխնախարարը կարևորել է, որ համաձայնագրի ստորագրումը իրավական հիմքեր կստեղծի բնակարանային ոլորտում համագործակցության համար:
Պարոն Գրեգ Ֆոստերը, շնորհակալություն հայտնելով նախարարության ներկայացուցիչներին Հայաստանում իրենց կազմակերպությանը աջակցելու և համագործակցելու համար, նշել է, որ միայն այս տարի իրենց հիմնադրամը պլանավորել է բարելավել ավելի քան 500.000 մարդու բնակարանային պայմաններ՝ այս համատեքստում պատրաստակամություն հայտնելով իրենց ծրագրի շրջանակներում օգնելու և աջակցելու Հայաստանին:
Բաժանորդագրվեք մեր ալիքին Telegram-ում