ՀՀ առաքվող բնական գազի, նավթամթերքների համար ռուսական կողմը մաքսատուրք չի գանձի
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության կառավարությունը հավանության տվեց Հայաստանի և Ռուսաստանի կառավարությունների միջև 2013 թվականի դեկտեմբերի 2-ի՝ Հայաստանի Հանրապետություն բնական գազի, նավթամթերքների և չմշակված բնական ալմաստների առաքման ոլորտում համագործակցության վերաբերյալ համաձայնագրին կից արձանագրության ստորագրմանը։ «Արմենպրես»-ի փոխանցմամբ՝ դեկտեմբերի 25-ին կառավարության նիստում ՀՀ էներգետիկայի և բնական պաշարների նախարար Երվանդ Զախարյանը հիշեցրեց, որ համաձայնագրով ՌԴ-ից ՀՀ առաքվող բնական գազի, նավթամթերքների և չմշակված ալմաստների համար ռուսական կողմը արտահանման մաքսատուրք չի գանձելու:
Որոշմամբ ՀՀ էներգետիկայի և բնական պաշարների նախարարին լիազորություն տրվեց ստորագրել արձանագրությունը: Արձանագրության ստորագրումը հնարավորություն է ընձեռում իրավահավասարության փոխշահավետության հիման վրա երկու երկրների միջև շարունակել զարգացնել տնտեսական հարաբերություններ: Արձանագրության ստորագրումը կնպաստի երկու երկրների միջև փոխշահավետ համագործակցության, տնտեսական կապերի զարգացման համար բարենպաստ պայմանների ստեղծման, գործարար ակտիվության բարձրացմանշարունակմանը:
Հարցը ներառված է նաեւ ՌԴ կառավարության դեկտեմբերի 25-ի նիստում: «Արձանագրությունը ենթադրում է բնական գազի, նավթամթերքների և չմշակված բնական ալմաստների առաքման մաքսատուրքերի չգանձման ռեժիմը երկարաձգել 2015թ. հունվարի 1-ից մինչեւ դեկտեմբերի 31-ը»,-նշված է ՌԴ կառավարության որոշման նախագծում:
Բաժանորդագրվեք մեր ալիքին Telegram-ում