ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: ԵԱՀԿ Մինսկի խմբի ԱՄՆ համանախագահը Լեռնային Ղարաբաղի հակամարտության կարգավորման հնարավոր ուղիների մասին կխոսի Քարնեգիի միջազգային խաղաղության հիմնադրամում (Carnegie Endowment for International Peace): Ինչպես հաղորդում է «Արմենպրես»-ը, այս մասին ԱՄՆ համանախագահը գրառում է կատարել Twitter-ի իր միկրոբլոգում:

«Իմ` «Լեռնային Ղարաբաղ. կարգավորման բանալիները» խորագրով ելույթը վաղը կլինի Քարնեգիի միջազգային խաղաղության հիմնադրամում: Դա կլինի Միացյալ Նահանգների քաղաքականության հայտարարությունը»,- գրել է Ուորլիքը:

Չնայած ԵԱՀԿ Մինսկի խմբի շրջանակներում հակամարտության կարգավորման միջազգայնորեն ընդունված միակ ձեւաչափով տարվող բանակցություններին եւ դրանք Մինսկի գործընթացի շրջանակներում ընթանալու պայմանավորվածություններին, Ադրբեջանը` խեղաթյուրելով հակամարտության էությունն ու հետեւանքների բուն պատճառները, նաեւ փորձեր է ձեռնարկում հակամարտության կարգավորման մեջ ներքաշելու այլ միջազգային կազմակերպությունների եւ բանակցային գործընթացը խոչընդոտող եւ քարոզչական նպատակներ հետապնդող զուգահեռ գործընթացներ է նախաձեռնում մասնավորապես ՄԱԿ ԳԱ-ում եւ Եվրոպայի խորհրդում: Վերջերս Ադրբեջանի փոխարտգործնախարար Արազ Ազիմովը քննադատել էր ԵԱՀԿ ՄԽ ամերիկացի համանախագահ Ջեյմս Ուորլիքին՝ նշելով, որ հնարավոր է ադրբեջանական կողմը պահանջի ամերիկացի համանախագահի հեռացումը։