Գալուստ Սահակյանը մեկնաբանել է ՕԵԿ-ական նախարարների` կուսակցությունը լքելու քայլը
ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: «Օրինաց երկիր» կուսակցության շարքերը լքելու նախարարի պաշտոնակատարների որոշումը քաղաքական ուժի սկզբունքների փոփոխության արդյունք է: Այս մասին Ազգային ժողովում լրագրողների հետ զրույցում ասաց ԱԺ ՀՀԿ խմբակցության ղեկավար Գալուստ Սահակյանը՝ անդրադառնալով ՕԵԿ նախկին անդամներ, նախարարի պաշտոնակատարներ Սերգո Կարապետյանի, Սամվել Թադևոսյանի և Արմեն Երիցյանի որոշմանը կուսակցության շարքերը լքելու մասին: «Ինձ համար ընդունելի չէ, երբ որևէ քաղաքական ուժի այն դերակատարները, ովքեր հասարակությանը ներկայացնում են իրենց կուսակցությունը, լքում են այն: Սակայն եթե կուսակցությունը փոխում է իր քաղաքական սկզբունքը, ցանկացած անդամ ազատ է իր որոշման մեջ»,- «Արմենպրես»-ի հաղորդմամբ՝ ասաց Սահակյանը:
Հարցին, թե պատրաստ է նա լքել ՀՀԿ-ն, եթե վերջինս զրկվի իշխանությունից, Գալուստ Սահակյանը պատասխանեց. «Եթե Հանրապետականը որդեգրի սոցիալիստական գաղափարախոսությունը, ես միանգամից դուրս կգամ, բայց կմնամ Հանրապետական»:
ՕԵԿ-ն ապրիլի 16-ին հայտարարեց, որ կոալիցիոն կառավարությունում մնալը ոչ նպատակահարմար եւ խնդրահարույց է համարել, իսկ կուսակցության քվոտայով գործադիրում գտնվող նախարարը որոշում են կայացրել լքել կուսակցությունը:
Բաժանորդագրվեք մեր ալիքին Telegram-ում