ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: ԱՄՆ Ներկայացուցիչների պալատի անդամ Բրեդ Շերմանը կոչ է արել պետքարտուղար Ջոն Քերիին հրաժարվել Ադրբեջանին ռազմական օգնություն հատկացնելու գաղափարից: Ինչպես հաղորդում է «Արմենպրես»-ը, կոնգրեսականը ելույթ է ունեցել 2014 թվականի մարտի 13-ին` ԱՄՆ Կոնգրեսի արտաքին հարաբերությունների հանձնաժողովի նիստում ատաքին քաղաքականության բյուջեի քննարկման ժամանակ:

«Ես ողջունում եմ Ջոն Քերիին, սենատոր եղած տարիներին Հայոց ցեղասպանության ճանաչման գործում մղած պայքարի համար և հույս ունեմ, որ որպես ԱՄՆ պետքարտուղար դուք կշարունակեք նույն կերպ վարվել: Եվ իհարկե, ի նկատի ունենալով, որ ՆԱՏՕ-ի դասընթացների ժամանակ հայ սպային քնի ժամանակ սպանած ադրբեջանցի սպան փառաբանվել և խրախուսվել է իր երկրում, ինչպես նաև ագրեսիայի մյուս դրսևորումները, ես հույս ունեմ, որ դուք կվերանայեք և կհրաժարվեք Ադրբեջանին որևէ ռազմական օգնություն տրամադրելու գաղափարից, ինչպես նաև կնախազգուշացնեք ադրբեջանցիներին, որ պարզապես վրդովվեցնող է նրանց կողմից Լեռնային Ղարաբաղի օդանավակայան թռչող քաղաքացիական ինքնաթիռի վրա կրակ բացելու սպառնալիքը»,- նշել է կոնգրեսականը:

ԱՄՆ-ն նվազեցրել է Ադրբեջանին տրամադրվելիք ֆինանսական աջակցության ծավալը: 2014 թվականին այդ երկրին տրվել էր 15,5 միլիոն ԱՄՆ դոլար աջակցություն, իսկ արդեն 2015-ին ԱՄՆ հատկացման չափը հասել է 12,7 միլիոն ԱՄՆ դոլարի: Տրամադրվելիք գումարից 9,6 միլիոնը կուղորդվի Ադրբեջանին տնտեսական աջակցման համար, 800 հազար ԱՄՆ դոլարը` թմրանյութերի շրջանառության դեմ պայքարի, 600 հազարը` ռազմական ուսուցման, 1,7 միլիոն ԱՄՆ դոլարը` ռազմական աջակցության համար: