ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: ԱՄՆ պետքարտուղարի թեկնածու Ջոն Քերին հայկական թեմաներին առնչվող հարցերին կպատասխանի գրավոր: Ինչպես «Արմենպրես»-ին տեղեկացրին Ամերիկայի հայկական համագումարից, թեկնածուին հարցեր կուղղի Կալիֆորնիայից ընտրված դեմոկրատ սենատոր Բարբառա Բոքսերը` հրապարակայնորեն պարզելու Քերիի դիրքորոշումը հայկական հարցերի առնչությամբ:  

Թեկնածուն ԱՄՆ Սենատի արտաքին հարաբերությունների հանձնաժողովում հունվարի 24-ին պատասխանել է սենատորների հարցերին սիրիական հիմնախնդրի, ռուս-ամերիկյան հարաբերությունների, Իրանի հետ երկխոսության, ԱՄՆ դիվանագիտության հետագա առաջնահերթությունների մասին: Նա արտահայտվել է Իրանի հետ բանակցությունների շարունակման օգտին` շեշտելով, որ Միացյալ Նահանգները շարունակելու է դեմ լինել իրանական միջուկային ծրագրին: Պետքարտուղարի թեկնածուն նաեւ հավաստիացրել է, որ պաշտոնական Մոսկվայի եւ Վաշինգտոնի միջեւ փորձելու է հարաբերությունների ավելի բարենպաստ միջավայր ստեղծել: Ակնկալվում է, որ Սենատը կհաստատի Քերիին ԱՄՆ Պետքարտուղարի պաշտոնում:

Մասաչուսեթս նահանգից ընտրված դեմոկրատ սենատոր Ջոն Քերրին, որը 2ՕՕ4 թվականի նախագահական ընտրություններում Դեմոկրատական կուսակցության թեկնածուն էր, հայտնի է որպես հայանպաստ կոնգրեսական, որը բազմիցս է հանդես եկել Հայոց ցեղասպանությունն ԱՄՆ-ի կողմից ճանաչելու, Հայաստանի հետ կապերն ամրապնդելու, Լեռնային Ղարաբաղի իրավունքները ճանաչելու նախաձեռնություններով։