Բիձինա Իվանիշվիլին բարձր է գնահատում հայ համայնքի ներուժը
ԵՐԵՎԱՆ, 9 ՀՈՒՆՎԱՐԻ, ԱՐՄԵՆՊՐԵՍ: Վրաստանի վարչապետ Բիձինա Իվանիշվիլիին հունվարի 6-ին այցելել է Հավլաբարի Սուրբ Էջմիածին եկեղեցի, մասնակցել պատարագի և շնորհավորել վիրահայության Սուրբ Ծնունդը, որից հետո ոչ պաշտոնական ձևաչափով հանդիպել է վիրահայության հետ: Այս մասին «Արմենպրես»-ի հետ զրույցում հայտարարեց «Բազմազգ Վրաստան» կազմակերպության ղեկավար Առնոլդ Ստեփանյանը:
«Բիձինա Իվանիշվիլիի այցի ժամանակ գեղեցիկ, տոնական տրամադրություն էր տիրում: Միջոցառումը բաղկացած էր երկու մասից: Հանդիպման ժամանակ հնչել են մի շարք հարցեր, անդրադարձ է եղել նաև հայկական եկեղեցիների հարցին»,-ասաց Ստեփանյանը: «Իվանիշվիլին հորդորեց չվախենալ այդ մասին խոսելուց և փորձել ընդհանուր կարծիք ձևավորել այս հարցի շուրջ»,-ընդգծեց Ստեփանյանը:
Նրա խոսքով՝ հայկական եկեղեցիների հարցում շատ կարևոր է նաև Վրաստանի եկեղեցու դիրքը, «քանզի նրա որոշումները վճռորոշ դեր ունեն»:
«Բիձինա Իվանիշվիլին հայտարարեց, որ Վրաստանի հայկական համայնքը կարևոր դեր ունի Վրաստանի համար, և որ իր քաղաքական թիմն օգտագործելու է վիրահայերի ներուժը»,-ասաց Առնոլդ Ստեփանյանը:
2012-ին Վրաստանի խորհրդարանական ընտրություններում հաղթանակ տարավ «Վրացական երազանք» կոալիցիան՝ ընդդիմության առաջնորդ Բիձինա Իվանիշվիլիի գլխավորությամբ: ԵԱՀԿ-ի դիտորդներն ազատ են համարել հոկտեմբերի 1-ին Վրաստանում կայացած ընտրությունները, որոնց ընթացքում չորսամյա ժամկետով ընտրվել է 150 պատգամավոր:
Բաժանորդագրվեք մեր ալիքին Telegram-ում