ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: Հայկական ատոմային էլեկտրակայանի նոր էներգաբլոկի կառուցման  աշխատանքներում առաջընթաց կա: Ինչպես հաղորդում է «Արմենպրես»-ը, այս մասին լրագրողների հետ հանդիպման ժամանակ հայտարարեց ՀՀ էներգետիկայի եւ բնական պաշարների նախարար Արմեն Մովսիսյանը:

Նրա խոսքով` «Ռոսատոմ» ընկերության ղեկավար Սերգեյ Կիրիենկոն վերջերս Հայաստան կատարած այցի ժամանակ էլ վերահաստատեց եղած մոտեցումները, համաձայն որի` ռուսական կողմը պատրաստ է իրականացնել ներդրումների 50 տոկոսը:

«Նրանք առաջարկում են` մյուս 50 տոկոսի ներդրումը կատարի ՀՀ կառավարությունը` զերծ մնալով այլ ընկերություններին այդ գործընթացում ներգրավելուց: Այսինքն պետական պարտք ձեւավորենք եւ այն ներդնենք նոր էներգաբլոկի կառուցման համար: Այդ մոտեցումն առաջին հայացքից ընդունելի է, բայց մենք նախընտրում ենք հետեւյալ տարբերակը. եթե լինեն նաեւ այլ ընկերություններ, որոնք կհամաձայնեն ավելի լավ պայմաններով ներդրումներ կատարել, կհամաձայնենք իրենց ներգրավել այս ծրագրի մեջ»,- ասաց նախարարը:

Նրա խոսքով, եթե տարբերակներ չլինեն, այդ առաջարկը կընտրեն` նոր կառուցվող էներգաբլոկում ունենալով 51 տոկոս բաժնեմաս:

Նախարարը վստահեցրեց, որ նոր էներգաբլոկի կառուցումը կլինի ըստ ժամանակացույցի ու շահագործման կհանձնվի 2019-2020 թվականներին:  

Դիտվել է 571 անգամ