Նորատուսի պատմական հուշարձաններ այցելող զբոսաշրջիկների թիվը տարեցտարի ավելանում է
ԳԱՎԱՌ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Նորատուս գյուղը հարուստ է պատմամշակութային հուշարձաններով, որոնց շարքում առանձնահատուկ տեղ ունեն Նորատուսի պատմական գերեզմանոցի միջնադարյան շրջանի խաչքարերը:
Ինչպես «Արմենպրես»-ի Գեղարքունիքի թղթակցին տեղեկացրեց Նորատուսի համայնքի ղեկավարի տեղակալ Վաչիկ Խաչատրյանը, Նորատուսի խաչքարեր եւ եկեղեցիներ զբոսաշրջիկների մուտքը վերջին 2-3 տարիների ընթացքում նվազ է միայն ձմռան ամիսներին, իսկ վաղ գարնանից մինչեւ ուշ աշուն այստեղ են այցելում աշխարհի բազմաթիվ երկրների հազարավոր զբոսաշրջիկներ: Միջին հաշվով օրական 200-300 զբոսաշրջիկ է այցելում Նորատուս՝ ամենայն ուշադրությամբ դիտելով եւ ուսումնասիրելով հուշարձանների պատմությունը: Վերջերս Նորատուս է այցելել Վոլգոգրադի հայկական համայնքի՝ 15-23 տարեկան երիտասարդների խումբը: 48 երիտասարդներից 9-ը եղել են նախկին նորատուսցիների թոռներ, ովքեր գտել են իրենց պապերի շիրիմները եւ հարգանքի տուրք մատուցել նրանց հիշատակին:
Նորատուսի պատմական գերեզմանոցի մուտքի մոտ տեղադրված ցուցատախտակ-ազդագիրը զբոսաշրջիկներին գյուղի եւ հուշարձանի պատմությունը ներկայացնում է անգլերեն, ռուսերեն, ֆրանսերեն, գերմաներեն, իտալերեն, հայերեն եւ կույրերին հասկանալի բրայլյան այբուբենով:
Բաժանորդագրվեք մեր ալիքին Telegram-ում