ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ։ ՀՀ աշխատանքի և սոցիալական հարցերի նախարարության նախաձեռնությամբ «Նորք» տեխնոլոգիաների կենտրոնը գործարկել է e-work.am աշխատանքի պրոֆեսիոնալ հարթակը։ Այն եզակի հարթակ է, որտեղ աշխատանք փնտրողները և աշխատանք առաջարկողները կարող են անվճար գրանցվել ու օգտվել տրամադրվող լայն գործիքակազմից։ «Արմենպրես»-ի մամուլի սրահում հրավիրված ասուլիսում «Նորք» տեխնոլոգիաների կենտրոնի գործադիր տնօրեն Անահիտ Պարզյանը նշեց, որ հարթակը բաց է բոլորի համար և արդեն ցանկացողները կարող են գրանցվել։

«Ի թիվս այլ ոլորտների, զբաղվածության ոլորտը ևս պետք է թվայնացման գործընթացի մաս կազմի։ Ահա ստեղծել ենք այս նոր հարթակը, որը հնարավորություն է տալիս մի կողմից ծանոթանալու առկա թափուր աշխատատեղերին, մյուս կողմից աշխատանք առաջարկողները, տարբեր տեսակի կառույցներն իրենց հիմնական կամ սեզոնային աշխատանքները կարող են ներկայացնել այս հարթակում»,-ասաց Անահիտ Պարզյանը։

Գործիքակազմից օգտվելու համար անհրաժեշտ է գրանցվել e-work.am հարթակում, լրացնել անձնական տվյալները։ Համակարգն ունի հնարավորություն մեկ հպումով ավելացնել հարկային համակարգում առկա տվյալ անձի աշխատանքային պատմությունը։ Անձը նաև ունի հնարավորություն որոշելու, թե իր տվյալներից որ մասը կարող է լինել հրապարակային տեսանելի, որ մասը՝ ոչ։  Խմբագրել կոճակով անձը կարող է իր ինքնակենսագրության մեջ ավելացնել անհրաժեշտ տվյալները։

«Այն, որ շատերը փորձ չունեն ճիշտ CV կազմելու հարցում, ահա այս համակարգը այդ առումով կարող է օգտակար լինել։ Ասեմ, որ համակարգն ունի հարուստ գործիքակազմ, որպեսզի օգտատերը կարողանա զտել և թողնել միայն իրեն հետաքրքրող աշխատանքի ուղղությունները»,-ասաց Անահիտ Պարզյանը։   

Հարթակը նաև բացառիկ հնարավորություն է՝ ներգրավվելու պետական և մասնավոր հատվածի կողմից իրականացվող զբաղվածության ծրագրերում: «Ֆեյսբուք» սոցիալական ցանցում արդեն բացվել է e-work.am-ի էջը և նրանք, որոնք համակարգից օգտվելու հետ կապված հարցեր ունեն, կարող են գրել։ Շուտով նաև պատրաստ կլինի տեղեկատվական տեսանյութ, որտեղ քայլ առ քայլ ցույց կտա համակարգից օգտվելու հնարավորությունները։