368.52
1 րոպեի ընթերցում
Հասարակական տրանսպորտի համալիր բարելավման ծրագրի շրջանակում Երևանի կանգառներում տեղադրվում են էլեկտրոնային չվացուցակներ:
«Արմենպրես»-ի հաղորդմամբ՝ Երևանի քաղաքապետարանի գործակարգավարական խորհրդակցության ժամանակ այս մասին հայտնեց «Երևան քաղաքի կառավարման տեխնոլոգիաների կենտրոն»-ի տնօրեն Սարգիս Մանուկյանը՝ նշելով, որ պիլոտային ծրագրի շրջանակում վեց կանգառասրահ կահավորված է այս սարքավորումներով և որոշակի ժամանակաշրջան արդեն աշխատում են:
«Այս պահին ունենք ծրագրի ընդլայնման ևս մեկ փուլ. 30 սարքավորում արդեն իսկ ներկրված է Հայաստան, առաջիկայում իրականացվելու են տեղադրման նախապատրաստական աշխատանքները»,-նշեց Մանուկյանը:
Քաղաքապետ Տիգրան Ավինյանի այն հարցին, թե էլեկտրոնային չվացուցակների տված տեղեկատվությունը ինչքանով է համապատասխանում իրականության, կան արդյո՞ք շեղումներ, Մանուկյանը պատասխանեց, որ տվյալ պահին կանգառասրահներում ցուցադրվող տեղեկատվությունը փոխկապակցված է Yandex հարթակի հետ:
«Ունենք բողոքներ, որոշ դեպքերում որոշակի շեղումներ առաջացել են: Այս պահին ևս մեկ այլընտրանքային՝ 2GIS հարթակի միջոցով ենք փորձարկում իրականացնում, կընտրենք ճշգրիտ տարբերակը»,-ասաց Սարգիս Մանուկյանը: