Օպերայի հարակից հատվածի սրճարանն ապամոնտաժվում է

Երևանի քաղաքապետարանը հանրային տարածքները վերադարձնում  է երևանցիներին. ապամոնտաժվել է Սայաթ Նովա 2/2 հասցեում՝  Օպերայի հարակից տարածքում մոտ 1000 քառակուսի մետր տարածքում կառուցված սրճարանը: 

«Արմենպրես»-ի հաղորդմամբ՝  աշխատանքներին հետևել է Երևանի քաղաքապետ Տիգրան Ավինյանը:

«Այսօր մենք իրականացնում ենք քանդման աշխատանքներ  Սայաթ Նովա 2/2 հասցեում՝ մոտավորապես 1000 քառակուսի մետր տարածքում, որը  վարձակալի կողմից վերադարձվել է քաղաքին: Մենք կարծում ենք, որ նման գործընթացներն այս   տարածքում լինելու են շարունակական:  Շատ կարևոր է, որ տվյալ տարածքները, որոնք  մաքրվում են, վերածվեն  մաքուր ու  կանաչ հատվածի:  Այս քաղաքականությունը լինելու է շարունակական, ինչպես տարբեր այգիներում, այնպես էլ օպերայի հարակից տարծքներում»,- ասաց Ավինյանը: 

Քաղաքապետն ընդգծեց՝ գնում են այն ճանապարհով, որ վարձակալներն իրենց կամքով քաղաքին վերադարձնեն տարածքները: Ըստ Ավինյանի՝ քաղաքապետարանը համապատասխան բոլոր պայմանները ստեղծել է դրա համար, որպեսզի փուլ առ փուլ, առանց դատական վեճերի և քաշքշուկների խնդիրը լուծեն ու առաջ շարժվեն, ինչպես եղել է քանդվող շինության դեպքում:

Անդրադառնալով քանդված տարածքի կանաչապատման հարցին՝ քաղաքապետը նշեց, որ դա կախված է քանդման աշխատանքների ծավալներից  և ընթացքից. 

«Բոլոր այն հատվածներում, որտեղ մենք կիրականացնենք քանդման աշխատանքներ, արդեն կարճ ժամկետում կսկսենք իրականացնել նաև կանաչապատման աշխատանքները: Կոնկրետ Օպերայի այս հատվածում գարնանն արդեն աշխատանքները կսկսվեն»,- մանրամասնեց Ավինյանը: 

Ավինյանն ընդգծեց՝ բոլոր այն այգիներն ու հատվածները, որտեղ տարատեսակ կրպակներ և հնաոճ սրճարաններ են, քաղաքապետարանի ուշադրության կենտրոնում են: Ըստ նրա՝ տարբեր այգիներում նմանատիպ ծրագրեր իրականցրել են և շարունակելու են իրականացնել, քանի որ կանաչապատ տարածքների ավելացումը քաղաքապետարանի ամենակարևոր նպատակներից մեկն է: 

Խոսելով Օղակաձև այգու վերականգնման հարցից՝ Ավինյանն ասաց, որ այգու տարբեր հատվածներում արդեն իսկ  տարբեր ծրագրեր իրականացվել են, բայց քաղաքապետարանը այգու չորրորդ հատվածի վերաբերյալ ունի  մեծ ծրագիր, որն արդեն ներկայացվել է հանրությանը։ Այս պահին ծրագրի հետագա ընթացքը քննարկվում է կառավարության հետ: