Պետությունը նախատեսում է ներկրվող բիտումի որակը ստուգելու համար անցակետերում հիմնել լաբորատորիաներ
1 րոպեի ընթերցում
ԵՐԵՎԱՆ, 3 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ տարածքային կառավարման և ենթակառուցվածքների նախարարությունը նախատեսում է առաջիկայում Հայաստանի անցակետերում ունենալ լաբորատորիաներ, որտեղ կստուգվի ներկրվող բիտումի որակը: «Արմենպրես»-ի հաղորդմամբ՝ լրագրողների հետ զրույցում այս մասին ասաց նախարար Սուրեն Պապիկյանը:
«Առաջիկայում նախատեսում ենք նաև լաբորատորիաներ ունենալ ՀՀ անցակետերում, որպեսզի ներկրվող բիտումը, որը ասֆալտի հիմնական հատվածն է, ու ասֆալտի որակը հիմնականում կախված է դրանից, լինի բարձր որակի»,-ասաց Պապիկյանն ու հավելեց՝ նպատակն այն է, որ որևէ մեկը չկարողանա որևէ կապալառուի, ներմուծող ընկերության խաբել:
Նախարարը նշեց՝ ներկայումս բիտումը հիմնականում ներմուծվում է Իրանից: Պապիկյանը հիմա բանակցում է ռուս գործընկերների հետ՝ ռուսական բիտում ներմուծելու հնարավորություն ստանալու նպատակով: Նախարարը նշեց՝ ռուսական բիտումի որակն ավելի բարձր է: