ԱԺ-ն միաձայն վավերացրեց ՀՀ-ի և Կորեայի կառավարությունների միջև ներդրումների խրախուսման ու փոխադարձ պաշտպանության մասին համաձայնագիրը

ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Հայաստանի Հանրապետության Ազգային ժողովը վավերացրեց «Հայաստանի Հանրապետության կառավարության և Կորեայի Հանրապետության կառավարության միջև ներդրումների խրախուսման և փոխադարձ պաշտպանության մասին» համաձայնագիրը: «Արմենպրես»-ի փոխանցմամբ նախագիծն Ազգային ժողով է ներկայացրել ՀՀ կառավարությունը:

Հայաստանի Հանրապետության կառավարության և Կորեայի Հանրապետության կառավարության միջեւ ներդրումների խրախուսման եւ փոխադարձ պաշտպանության մասին» համաձայնագիրը ստորագրվել է 2018 թվականի հոկտեմբերի 19-ին Երեւան քաղաքում: Համաձայնագրով սահմանված են Հայաստանի Հանրապետության և Կորեայի Հանրապետության միջեւ ներդրումային գործունեության ընդհանուր սկզբունքները: Համաձայնագիրը հնարավորություն է ընձեռում հավասարության և փոխշահավետության հիման վրա ստեղծել բարենպաստ պայմաններ երկու երկրների ներդրողների համար` նպաստելով երկու երկրներում գործարար նախաձեռնությունների խթանմանը: Համաձայնագիրը յուրաքանչյուր կողմի ներդրողին երաշխավորում է լիարժեք պաշտպանություն և անվտանգություն, ինչպես նաև արդար և հավասար ռեժիմ միջազգային իրավունքին համապատասխան:

Համաձայնագիրը վավերացվեց միաձայն՝ 102 կողմ ձայնով: