Աշխատելու ենք բաց աչքերով ու ականջներով՝ արձանագրելով այն ամենն, ինչ տեսնելու ենք. ԵԱՀԿ ԺՀՄԻԳ դիտորդական առաքելության ղեկավարն՝ ԱԺ ընտրությունների մասին

ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում դեկտեմբերի 9-ին կայանալիք արտահերթ խորհրդարանական ընտրությունները դիտարկելու նպատակով Հայաստանում են ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) ընտրությունների դիտորդական առաքելության ներկայացուցիչները: «Արմենպրես»-ի հաղորդմամբ` ԵԱՀԿ ԺՀՄԻԳ-ի՝ ընտրությունների դիտորդական առաքելության ղեկավար Ուրշուլա Գաչեկը լրագրողների հետ զրույցում ասաց, որ իրենք որևէ նախնական դիրքորոշում չունեն ընտրությունների արդյունքների հետ կապված:

«Մենք այստեղ ենք ոչ թե քննադատելու, այլ դիտարկելու համար: Մենք որևէ քաղաքական օրակարգ չունենք, այստեղ ենք՝ դիտարկելու ընտրական գործընթացը: Մենք հետևելու ենք այն նույն ստանդարտներին, որը կիրառում ենք ԵԱՀԿ ցանկացած երկրում կազմակերպվող ընտրության ժամանակ»,-ասաց նա:

Գաչեկը նշեց, որ դիտորդական առաքելությունը տեղյակ է, որ Ազգային ժողովը չի ընդունել ընտրական օրենսգրքի փոփոխությունները: «Մենք գործ ենք ունենալու այն օրենքի հետ, որը հիմա գործում է: Մեր թիմը նախախնամություն չունի: Մենք աշխատելու ենք բաց ականջներով և աչքերով, և արձանագրելու ենք այն, ինչ տեսնելու ենք»,-ասաց Գաչեկը: Նրա խոսքով` կիրակի Հայաստան է ժամանել 13 դիտորդ, ում կմիանան նաև 24 երկարաժամկետ դիտորդներ:

«Ընտրություններից մի քանի օր առաջ 250 դիտորդներ ևս կմիանան մեզ և կմասնակցեն ընտրական գործընթացին: Դա բավական չհամարելով՝ ԵԱՀԿ խորհրդարանական վեհաժողովի ներկայացուցիչներ , Եվրախորհրդի ներկայացուցիչներ , ինչպես նաև Եվրոպական պառլամենտի պատգամավորներ ևս կընդգրկվեն դիտորդական առաքելության կազմում: Մենք բոլորս միասին կկառուցենք մի մեծ միջազգային դիտորդական առաքելություն»,-նշեց նա: