Շվեյցարիան ավելի, քան երբեւէ շահագրգիռ է Հայաստանի հետ տնտեսական հարաբերությունների ամրապնդմամբ
3 րոպեի ընթերցում
ԵՐԵՎԱՆ, 28 ՀՈՒՆԻՍ, ԱՐՄԵՆՊՐԵՍ: Հայաստան-Շվեյցարիա տնտեսական երկկողմ համագործակցության հնարավորությունները բավականին մեծ են: Այս մասին «Արմենպրես»-ի հետ զրույցում նշեց Շվեյցարիայի խորհրդարանի փոխնախագահ, Շվեյցարիա-Հայաստան խորհրդարանական խմբի համանախագահ Դոմինիկ դը Բյումանը, ով խորհրդարանական խմբի գլխավոր քարտուղար Սարգիս Շահինյանի հետ օրերս պաշտոնական այցով Հայաստանում էր: «Մենք պետք է զարգացնենք հարաբերությունները, քանի որ ցանկություն կա թե՛ Շվեյցարիայում, թե՛ Հայաստանում: Երկու երկրները շատ ընդհանրություններ ունեն: Շվեյցարիան էլ իր դժվարություններն ունի Եվրոպայի հետ, իսկ Հայաստանը շրջափակման մեջ է, սակայն միաժամանակ երկու պետություններն էլ ունեն միասին աշխատելու հնարավորության ըմբռնում: Հայաստանը լիովին ունի հնարավորություն` նոր շուկաներ գրավելու համար»,- ասաց Դոմինիկ դը Բյումանը:
Նրա խոսքով` այդ առումով Շվեյցարիայում տրամադրվածությունը ավելի հզոր է, քան նախկինում: «Ես եկա Հայաստան` խոսելու քաղաքական, տնտեսական պատասխանատուների հետ, որոնք պետք է արագ գործի անցնեն: Կարող եմ ասել, որ այժմ ընթացքի մեջ են դեղագործության, զբոսաշրջության, ինչու չէ` գյուղատնտեսության ոլորտները: Օրինակ` Շվեյցարիայում պակասում է բանջարեղենը: Համագործակցության մեծ պոտենցիալ կա ժամագործության, բանկային ոլորտներում: Իսկ կարեւորներից մեկը, թերեւս, էներգիայի ոլորտն է. Հայաստանում ահռելի մեծ են արեւային էներգիայի օգտագործման հնարավորությունները»,- ընդգծեց խորհրդարանական խմբի համանախագահը:
Խորհրդարանական խմբի գլխավոր քարտուղար Սարգիս Շահինյանի խոսքով` այցի հիմնական նպատակը տնտեսական երկկողմ հարաբերությունների ամրապնդումն էր: «Արդեն ժամանակն է պատմական խնդիրների հետ կապված փուլը մի փոքր շրջանցելու, սակայն ոչ անտեսելու իմաստով, քանի որ այժմ կարիք ունենք առաջ նայելու: Մեզ համար այժմ կարեւոր խնդիրն այն է, որ երիտասարդ ուժերի զարգացումը Հայաստանում լինի տեւական: Դրա համար այլ ելք չկա, քան արմատացնել մասամբ արդեն ձեւավորված տնտեսական հարաբերությունները: Մենք ցանկանում ենք այժմ Հայաստանին տրամադրել հնարավորություններ, մնում է դա վերցնել»,- նշեց Սարգիս Շահինյանը: