3 րոպեի ընթերցում
ԵՐԵՎԱՆ, 20 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` ապրիլի 20-ին, ՀՀ ԳԱԱ տարեկան ընդհանուր ժողովն է: ՀՀ ԳԱԱ 2015 թ-ի գիտական գործունեության հիմնական արդյունքների մասին զեկույցով հանդես կգա ՀՀ ԳԱԱ նախագահ, ակադեմիկոս Ռադիկ Մարտիրոսյանը: Ժողովին կմասնակցեն ՀՀ վարչապետ Հովիկ Աբրահամյանը, ՀՀ ազգային ժողովի, նախարարությունների ներկայացուցիչներ, գիտնականներ:
«Վերջ տանք թուրքական ապրանքի սպառմանը Հայաստանում և այլընտրաքային ճանապարհներ փնտրենք»: Թեմայի շուրջ իրենց դիտարկումներն են ներկայացնելու տնտեսագետ Թաթուլ Մանասերյանը, «Բողոքի ակցիա՝ ընդդեմ թուրքական ապրանքի» նախաձեռնության կազմակերպիչները, «Հանուն օրենքի» նախաձեռնության անդամները: Ապրիլի 21-ին էլ, նախատեսվում է բողոքի ակցիա կառավարության շենքի մոտ, որի ժամանակ կայրվեն թուրքական արտադրության ապրանքները:
Խոսքի ազատության պաշտպանության կոմիտեի նախագահ Աշոտ Մելիքյանը կներկայացնի կոմիտեի 2016թ. առաջին եռամսյակային զեկույցը, որը Հայաստանում խոսքի ազատության վիճակի և լրագրողների ու ԶԼՄ-ների իրավունքների խախտումների մասին է:
Ապրիլի 20-21-ը «Հայփոստ» ՓԲԸ-ի նախաձեռնությամբ Երևանում կայանալու է Եվրոպայի հանրային փոստային օպերատորների ասոցիացիայի՝ «PostEurop»-ի, տարեկան 31-րդ լիագումար համաժողովը: Միջոցառման շրջանակներում Հայաստան են ժամանելու Համաշխարհային փոստային միության գլխավոր տնօրեն Բիշար Աբդիրահման Հուսեյնը, «PostEurop» կազմակերպության գործադիր խորհրդի նախագահ Ժան Պոլ Ֆորսևիլը և գլխավոր քարտուղար Բոտոնդ Սեբենը, ինչպես նաև 40 երկրների փոստային կապի ազգային օպերատորների շուրջ 120 ներկայացուցիչներ:
Լեզվաբանական համալսարանի շրջանավարտները դասավանդելու են գյուղական, քաղաքային սահմանամերձ դպրոցներում: Այս կապակցությամբ Երևանի Վ. Բրյուսովի անվան պետական լեզվաբանական համալսարանի և «Դասավանդիր, Հայաստան» կրթական հիմնադրամի միջև կստորագրվի համագործակցության համաձայնագիր: Ըստ այդմ` շրջանավարտները և երիտասարդ մասնագետները քաղաքային և գյուղական սահմանամերձ դպրոցներում դասավանդելու են երկու տարի ժամկետով: Աշխատանք կտարավի նաև որակյալ մասնագետների պատրաստման ուղղությամբ` սահմանամերձ համայնքներում օտար լեզուներ դասավանդելու համար:
Մհեր Մկրտչյան թատրոնի ատենապետ Հարություն Չաթմաջյանը,Նյու Ջերսիի Թեքեյան մշակութային միության Նյու Յորքի մասնաճյուղի ատենապետ՝ Հակոբ Վարդիվառյանը, Սողոմոն Թեհլերյանի դերակատար Հարութ Բասմաջյանը և դերասանուհի Թամար Հովհաննիսյանը կխոսեն թատերախմբի հայաստանյան հյուրախաղերից, Հայաստան-Սփյուռք գործակցությունից:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: