Սպասվող լրահոս. 16.02.2016
4 րոպեի ընթերցում

ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Ի՞նչ խնդիրներ կան անձնական տվյալների պաշտպանության ոլորտում, այդ խնդիրների լուծման գործում որո՞նք են Անձնական տվյալների պաշտպանության գործակալության անելիքները: Այս և այլ հարցերին այսօր` փետրվարի 16-ին, անդրադառնալու է Արդարադատության նախարարության Անձնական տվյալների պաշտպանության գործակալության պետ Շուշան Դոյդոյանի ասուլիսը:
Արտաքին քաղաքական զարգացումներից փորձագիտական դաշտի քննարկումների առանցքում Թուրքիայի գործողություններն են` ուղղված Հալեպին: Թեմային անդրադառնալու է թուրքագետ Հակոբ Չաքրյանը: Կրկին Թուրքիայի մասին, բայց արդեն տեղի հայկական համայնքի խնդիրների շեշտադրմամբ խոսելու է տարածաշրջանային հարցերով փորձագետ-վերլուծաբան Սարգիս Հացպանյանը։ Նա կներկայացնի պոլսահայ համայնքում տիրող նոր իրավիճակը և կխոսի օրեր առաջ Ստամբուլում ՀՀ քաղաքացիների կողմից տարեց հայ ընտանիքի դեմ իրագործված ավազակային հարձակումից:
ՀՀ նախագահ Սերժ Սարգսյանի ելույթի ազդակներ, կադրային սպասվող փոփոխություններ, կոալիցիա: ԱԺ ՀՀԿ խմբակցության անդամ Ռուզաննա Մուրադյանը, ԱԺ ՀԱԿ խմբակցության ղեկավար Լևոն Զուրաբյանը, քաղաքագետ Ալեքսանդր Իսկանդարյանն են ներկայացնելու իրենց դիտարկումները:
Սահմանադրական հանրաքվեի՝ ընտրական թվերի մոնիտորինգի ամփոփիչ արդյունքները պատրաստվում է ներկայացնել «Թրանսփարենսի Ինթերնեյշնլ» հակակոռուպցիոն կենտրոնի գործադիր տնօրեն Վարուժան Հոկտանյան:
Զբոսաշրջության զարգացման խնդիրներ, հեռանկարներ, զբոսավարների դերակատարությունը զբոսաշրջության ոլորտում: ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը, Հայաստանի ներգնա տուր օպերատորների միության խորհրդի անդամ Վլադիմիր Գևորգյանը և Հայ զբոսավարների ասոցիացիայի նախագահ Լիա Բախշինյանը կներկայացնեն ոլորտի խնդիրներն ու գրանցված հաջողությունները:
Տեղեկատվության անվտանգության հիմնախնդիրները և համացանցում առկա նոր վիուսները: Ինչպես նախորդ շաբաթ, այս շաբաթ ևս տեղեկատվական անվտանգության փորձագետ Սամվել Մարտիրոսյանը ներկայացնում է ոլորտի խնդիրները:
Անցնենք մշակութային թեմաներին: Ժողովրդական արտիստ, պրոֆեսոր, Համազգային պետական թատրոնի գեղարվեստական ղեկավար Հրաչյա Գասպարյանը և թատրոնի դերասանները պատրաստվում են այսօր խոսել թատրոնի խնդիրներից: Նրանք կանդրադառնան տարածքի հարցին, թատրոնի գործունեությանն ու սպասվելիք ծրագրերին:
Այսօր Կոմիտասի թանգարան-ինստիտուտի համերգասրահում Հայ կոմպոզիտորական արվեստի 7-րդ փառատոնի շրջանակներում կներկայացվեն Էդգար Հովհաննիսյանի խմբերգերը։ Ելույթ կունենա Երևանի պետական կամերային երգչախումբը: Հայ կոմպոզիտորական արվեստի փառատոնը կազմակերպել են Հայաստանի պետական երիտասարդական նվագախումբը, Հայաստանի կոմպոզիտորների միությունը՝ ՀՀ մշակույթի նախարարության աջակցությամբ։ Փառատոնն անցկացվում է ՀՀ Նախագահի հովանու ներքո։
Այսօր կայանալու է Հայաստանի պետական կամերային նվագախմբի համերգը: Գեղարվեստական ղեկավար և գլխավոր դիրիժոր Վահան Մարտիրոսյան:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: