3 րոպեի ընթերցում
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Երեւանում մեկնարկել է Հայաստանի եւ Եվրամիության հարաբերություններին նվիրված համաժողով-քննարկում, որի նպատակն է հասարակությանը տեղեկացնել Հայաստանում ԵՄ-ի գործողությունների եւ ԵՄ-ին աջակցող կազմակերպությունների գործունեության մասին:
«Արմենպրես»-ի փոխանցմամբ, երկօրյա համաժողովի ընթացքում, որի անունն է «ԵՄ հաղորդակցության դասընթաց», կներկայացվի էստոնական փորձը, և հայ ու էստոնացի մասնագետները կխոսեն տարբեր ոլորտներում համագործակցության մասին:
«Արեւելյան գործընկերության էստոնական կենտրոնի» տնօրեն Մարգե Մարդիսալու-Կահարի գնահատմամբ, համաժողովի նպատակն է տարբեր ոլորտների ներկայացուցիչներին պատմել, թե Եվրամիությունն ինչպիսի ծրագրեր ու բարեփոխումներ է իրականացնելու Արեւելյան գործընկերության վեց երկրներում: «Եվրամիությունը Հայաստանում շատ լուրջ ծրագրեր է իրականացնում, եւ Հայաստան-ԵՄ հարաբերությունները ժամանակի ընթացքում պետք է ավելի խորանան, եւ շատ ոլորտներում համագործակցությունը պետք է լինի ավելի ամուր»,- Ավետիք Իսկահակյանի անվան գրադարանում կայացած հանդիպման ժամանակ ասաց Մարգե Մարդիսալու-Կահարը` հավելելով, որ ԵՄ նախաձեռնություններին պետք է շատ մարդկանց ներգրավել եւ տեղեկացնել հասարակությանը կատարվելիք աշխատանքների մասին:
Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանի գնահատմամբ Հայաստանը միտված է խորացնել հարաբերությունները Եվրամիության հետ, եւ այդ ցանկությունը կիսում է, թե՛ իշխանությունը, թե՛ հասարակությունը: «Նախորդ տարվա սեպտեմբերի 3-ից հետո ես հայտարարեցի, որ ԵՄ դուռը փակ է Հայաստանի համար, բայց բարեբախտաբար թե՛ այն ժամանակ, թե՛ այսօր այն կողպված չէ, եւ այսօր Հայաստանը ներգրավված է նոր աշխատանքում եւ ձեւակերպում է իրավական նոր համաձայնագիր Եվրամիության հետ հարաբերությունների կանոնակարգման եւ խորացման նպատակով: Այս առումով շատ կաեւոր է երկուստեք լրատվամիջոցների եւ քաղաքացիական հասարակության դերակատարությունը, որպեսզի Հայաստանում եւ Եվրամիությունում կողմերը կարողանան լավ աշխատել»,- ասաց Ռիչարդ Կիրակոսյանը:
Հոկտեմբերի 20-ին Երեւանում մեկնարկած համաժողովի նպատակն է ներկայացնել Եվրամիությունում Էստոնիայի անդամակցության փորձն ու ծառացած դժվարությունները, որոնք տասը տարվա ընթացքում էստոնացի հասարակությունը կարողացել է կարգավորել: Երկօրյա քննարկումներին կմասնակցեն հայ եւ էստոնացի քաղաքագետներ, փորձագետներ եւ խմբագիրներ: