ԱՄՆ-ն ոգևորված է Հայաստանի էներգետիկ ոլորտում ամենամեծ ներդրողը լինելու փաստով
2 րոպեի ընթերցում
![ԱՄՆ-ն ոգևորված է Հայաստանի էներգետիկ ոլորտում ամենամեծ ներդրողը լինելու փաստով](http://armenpress.am/resized/480/static/news/b/2014/01/748260.jpg)
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: «Որոտան hիդրոէլեկտրակայանների hամալիր» փակ բաժնետիրական ընկերության` ամերիկյան կողմի հետ վաճառքի մասին ստորագրված պայմանագիրը Հայաստանի էներգետիկ ոլորտում մեծ ներդրումներ կբերի: Այս մասին հունվարի 31-ին լրագրողների հետ հանդիպմանն ասաց Հայաստանում Ամերիկայի Միացյալ Նահանգների արտակարգ եւ լիազոր դեսպան Ջոն Հեֆերնը:
«Սա կլինի ԱՄՆ-ի կողմից Հայաստանի էներգետիկ ոլորտում երբեւէ կատարված ամենամեծ ներդրումը` 180- 250 միլիոն»,- ասաց նա:
Հեֆերնի խոսքով`Հայաստանում Միացյալ Նահանգների ներկայացուցչության առաջնակարգ խնդիրներից մեկը հայկական պետության հետ առավել ամուր ներդրումային և առևտրային կապեր ձևավորելն է, եւ այս գործարքի ստորագրումը դրա ապացույցներից մեկն է: «Մենք շատ ոգևորված ենք: Սա շատ կարևոր է ցանկացած երկրի համար` նաեւ էներգետիկ անվտանգության առումով»,- «Արմենպրես»-ի հաղորդմամբ` ասաց ԱՄՆ դեսպանը:
Հայաստանի Հանրապետության կառավարության, «Որոտան hիդրոէլեկտրակայանների hամալիր» փակ բաժնետիրական ընկերության, ամերիկյան «Քոնթուր գլոբալ հիդրոկասկադ» և «Սի-Ջի սոլյուշնս գլոբալ hոլդինգ քամփնի» ընկերությունների միջև ստորագրվել է գույքի առուվաճառքի պայմանագիր:
Առաջիկա 6 տարիների ընթացքում, ընկերությունը ստանձնել է պարտավորություն՝ ներդնելու շուրջ 70 մլն դոլար Որոտանի հիդրոկայանների համալիրի արդիականացման և վերանորոգման գործում՝ համաձայն նախապես ներկայացվելիք կապիտալ ներդրումների և ծախսերի ծրագրի, որը կքննարկվի և կհամաձայնեցվի Հանրային ծառայությունները կարգավորող հանձնաժողովի (ՀԾԿՀ) հետ։ Վերջինս հաստատել է նաև այն սակագնային պլանը, որի համաձայն ընկերությունը կապահովի մոտակա 25 տարիների ընթացքում Որոտան համալիրի անխափան և շարունակական շահագործումը: