ԵՐԵՎԱՆ, 22 ԱՊՐԻԼԻ, ԱՐՄԵՆՊՐԵՍ: Անհրաժեշտ է քայլեր իրականացնել Թուրքիայում Հայոց Ցեղասպանության հարցում առկատեղեկատվական «սովը» վերացնելու եւ արգելված թեմաների քննարկումներն ակտիվացնելու ուղղությամբ: Այդ մասին ապրիլի 22-ին լրագրողների հետ հանդիպմանը նման տեսակետ հայտնեց թուրքագետ Ռուբեն Մելքոնյանը: Տեղեկատվական քաղաքականության տեսանկյունից թուրքագետը կարեւորեց Թուրքիայում որոշակի տաբուների ճեղքման գործընթացը խորացնելուն նպաստելը: «Դրանք քայլեր են, որոնք կտանեն թուրքական հասարակությանն առերեսվելու իր պատմության հետ»,- «Արմենպրես»-ի փոխանցմամբ՝ ասաց Մելքոնյանը: Թիրախը պետք է լինի թուրքական հասարակությունը, որը տեղեկատվության պակաս ունի:
Թուրքագետը նշեց, որ հայ եւ թուրք գիտական շրջանակները Հայոց ցեղասպանության հարցում համեմատության եզրեր չունեն, քանի որ հայ գիտնականները հիմնվում են փաստերի վրա եւ տալիս օբյեկտիվ իրականությունը. «հայկական գիտական դաշտն Հայոց ցեղասպանության հարցում կատարել է իր առջեւ դրված խնդիրը»: «Բոլոր փաստերը կան պնդելու, որ թուրքական համալսարանները եւ թուրք գիտնականներն այդ հարցում չեն կարող մրցունակ լինել, քանի որ նրանց առջեւ բավական բարդ խնդիր է՝ մերժել ճշմարտությունը, հերքել անհերքելին»,- ասաց Մելքոնյանը՝ հավելելով, որ թուրքական աշխատություններն այդ ուղղությամբ միջազգային ասպարեզում լուրջ կասկածների են ենթարկվում:
Թուրքիան առաջին համաշխարհայինի տարիներին Արեւմտյան Հայաստանում բնաջնջեց 1,5 միլիոն հայերի, հարյուր հազարավորներին փախստական դարձնելով:Հայոց Ցեղասպանության փաստը ճանաչել են երկու տասնյակից ավելի պետություններ, միջազգային կառույցներ: