Բրիտանական հեղինակավոր հրատարակչությունը լույս է ընծայել «Ժամանակակից վեց հայ բանաստեղծներ» ժողովածուն
1 րոպեի ընթերցում
ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: Arc Publications բրիտանական նշանավոր հրատարակչություններից մեկը լույս է ընծայել «Ժամանակակից վեց հայ բանաստեղծներ» ժողովածուն: Այն հրատարակվել է Հայաստանի Հանրապետության մշակույթի նախարարության աջակցությամբ` «Երեւանը` գրքի համաշխարհային մայրաքաղաք» ծրագրի շրջանակում: Գիրքը հրատարակվել է «Նոր ձայներ Եվրոպայից եւ այն կողմ» մատենաշարով եւ երկլեզու է (անգլերեն եւ հայերեն):
Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, գրքում ընդգրկված են Հրաչ Սարուխանի, Խաչիկ Մանուկյանի, Անատոլի Հովհաննիսյանի, Ազնիվ Սահակյանի, Վիոլետ Գրիգորյանի, Հասմիկ Սիմոնյանի ստեղծագործությունները: Հրատարակիչների մասնակցությամբ ժողովածուն կազմել է Ռազմիկ Դավոյանը, թարգմանիչն է Արմինե Թամրազյանը: Գրքի շապիկը ձեւավորված է Մինաս Ավետիսյանի հեղինակած գեղանկարով: