ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: ՀՀ պաշտպանության նախարարության մամուլի քարտուղար Արծրուն Հովհաննիսյանը եւս մեկ անգամ վերահաստատել է, որ հայկական զինված ուժերն ի զորու են ապահովել Ստեփանակերտի օդանավակայանի թռիչքների անվտանգությունը:«Նախագահը հայտարարում է, որ Ստեփանակերտի օդանավակայանը գործարկվելու է, իսկ պաշտպանության նախարարը ասել է, որ եթե նման թռիչք իրականացվի, ապա մենք կարող ենք ապահովել դրանց անվտանգությունը»,-հիշեցրել է ՊՆ մամուլի քարտուղարը` տարօրինակ համարելով առանց որևէ խելամիտ փաստարկի հիշյալ հայտարարությունները հաշվի չառնողներին, ովքեր «շարունակում են թուրք-թաթարական բաշիբոզուկների հոխորտանքն արտատպել տարբեր տեղերում»:
Ինչպես հաղորդում է«Արմենպրես»-ը, ֆեյսբուքյան իր էջում Արծրուն Հովհաննիսյանն անդրադարձել է քաղաքացիական օդանավերը խոցելու Ադրբեջանի մտադրության «լրջությանը»: «Իսկ ով է ասո՞ւմ, որ Ադրբեջանը կատակ է անում, ոչ Ադրբեջանը կատակ չի անում, ինչպես կատակ չէր անում 1992, 1993, 1994 թվականներին, երբ Շուշիից բազմապատիկ ավելի մեծ ուժերով փախչում էին, երբ հազարավոր մոջահեդներով հարձակում էին գործում ու ատամները կոկորդներն էր մնում: Կատակ չեն անում, երբ հիմա դիվերսանտները իրենց ոտքով գալիս են, բայց մեջքի վրա հետ են գնում»,- հիշեցրել է Հովհաննիսյանը:
ՀՀ ՊՆ խոսնակը հավելել է, որ 1992 թվականին, երբ նույն օդանավակայանը ազատագրվեց ու վերսկսվեցին ՅԱԿ-40 ինքնաթիռների թռիչքները, այդ ժամանակ էլ Ադրբեջանն ուներ իբր 250 կմ հեռահարությամբ Ս-200 համակարգեր: «Իսկ ինչո՞ւ ոչ մի անգամ չկարողացավ ինքնաթիռ խոցել»,- հեգնել է Հովհաննիսյանը: