368.59
Քաղաքագետը Վրաստանում ԼՂ հակամարտության շուրջ ձևավորված կարծիքը փոխելու անհրաժեշտություն է տեսնում
2 րոպեի ընթերցում
ԵՐԵՎԱՆ, 8 ՀՈՒՆՎԱՐԻ, ԱՐՄԵՆՊՐԵՍ: Լեռնային Ղարաբաղի, Օսիայի և Աբխազիայի հիմնախնդիրների միջև հավասարության նշան է դրված Վրաստանում՝ Բաքվի քարոզչության շնորհիվ: Այդ մասին հունվարի 8-ին լրագրողների հետ հանդիպմանը ասաց քաղաքագետ Ալեքսանդր Մանասյանը՝ Իլյա Երկրորդ պատրիարքի հայտնի հայտարարությունների շուրջ քննարկումների ժամանակ: Քաղաքագետը կարևորեց Վրաստանում այդ խնդիրների միասնական ընկալումը փոխելու հարցում հայկական կողմի ակտիվ քայլերի նշանակությունը: «Մենք պետք է պաշտոնական դիվանագիտական և քարոզչական միջոցներով տարանջատենք այդ խնդիրները միմյանցից՝ հեշտացնելով վրացիների գործը»,- «Արմենպրես»-ի փոխանցմամբ՝ ասաց Մանասյանը:
Քաղաքագետի բնորոշմամբ՝ կեղծիքի և ապատեղեկատվության քաղաքական ուղեգիծը Բաքվի կողմից որդեգրված է դեռ տասնամյակներ առաջ: Քաղաքագետն Իլյա Երկրորդի արտահայտությունների հետ կապված երեք տարբերակ առաջարկեց՝ դրանցից ամենահավանականը համարելով վրաց պատրիարքի կողմից ոչինչ չասած լինելը կամ ինչ-որ հեռավոր բան ասած լինելը, որն աղավաղվել է Ադրբեջանի կողմից: «Ադրբեջանը նպատակ է ունեցել անհարմար կացության մեջ դնել Վրաստանին՝ փչացնելով հայ- վրացական հարաբերությունները»,- նշեց քաղաքագետը: Մանասյանն ամենամեծ խնդիրը Ադրբեջանի կողմից որդեգրված կեղծիքի և ապատեղեկատվության քաղաքականությունը համարեց:
Հուշարձանագետ Սամվել Կարապետյանը չբացառեց Իլյա Երկրորդի կողմից հակահայկական արտահայտությունների ուղղակի տեքստով ասած լինելը: Հուշարձանագետի կարծիքով՝ Արցախի խնդրի շուրջ Պատրիարքի և վրաց հասարակության գերակշիռ մասի պատկերացումները համընկնում են: «Սա իշխող տեսակետ է Վրաստանում»,- նշեց Կարապետյանը:
Ադրբեջանը, սովորության համաձայն, խեղաթյուրել էր վրաց պատրիարք Իլյա Երկրորդի կողմից Ադրբեջանի հոգևոր առաջնորդ Ալլահշյուքյուր Փաշազադեի հետ հանդիպմանը արված հայտարարությունը: Ադրբեջանական քարոզչամեքենան տարածել էր, թե իբր պատրիարքը Արցախը Ադրբեջանի մաս է համարել:
Բաժանորդագրվեք մեր ալիքին Telegram-ում