Փորձագետները ռուս-ադրբեջանական հարաբերությունների վատթարացում են կանխատեսում
2 րոպեի ընթերցում
![Փորձագետները ռուս-ադրբեջանական հարաբերությունների վատթարացում են կանխատեսում](http://armenpress.am/resized/480/static/news/b/2012/12/702408.jpg)
ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Գաբալային ռադիոտեղորոշիչ կայանի շահագործման դադարեցումը վկայեց, որ Ադրբեջանը ամեն պահ կարող է հարվածել Ռուսաստանի թիկունքին: Այդ մասին դեկտեմբերի 12-ին լրագրողների հետ հանդիպմանը նշեց ԵՊՀ դասախոս, պատմաբան Գեւորգ Մելքոնյանը: «Ռուսաստանը ևս մեկ անգամ համոզվեց, որ Ադրբեջանը հուսալի գործընկեր չէ»,- «Արմենպրես»-ի փոխանցմամբ` ասաց Մելքոնյանը:
Մելքոնյանի խոսքով՝ Ադրբեջանը հարվածում է Ռուսաստանի թիկունքին՝ հնարավորություն չտալով հարավային սահմանի պաշտպանական գոտին ամրապնդելու և իր վերահսկողության տակ պահելու: «Այս պարագայում Հայաստանի դերը տարածաշրջանում Ռուսաստանի համար մի քանի անգամ բարձրանում է», -ասաց Մելքոնյանը:
Պատմաբանը նշեց, որ Ադբեջանում լուրջ խուճապ կա Ռուսաստանի հետ հարաբերությունների վատացման հետ կապված: Բոլոր մակարդակներով փորձում են սիրաշահել Ռուսաստանին: «Մնացել է, որ Ալիևը հայտարարի, որ սա չի ազդելու ռուս-ադրբեջանական հարաբերությունների վրա»,- ընդգծեց Մելքոնյանը՝ հավելելով, որ կտուժեն նաև իրանա-ադրբեջանական հարաբերությունները: Նրա կարծիքով՝ Հայաստանում ռուսական ռազմաբազաները կարդիականացվեն:
Քաղաքագետ Սերգեյ Շաքարյանցի համոզմամբ՝ Գաբալայի հետ կապված դեպքը մոտ ապագայում բացասաբար կազդի ռուս-ադրբեջանական հարաբերությունների վրա, քանի որ Ադրբեջանը Ռուսաստանին զրկել է լուրջ լծակից: «Կայանը թույլ էր տալիս նույնիսկ Հնդկական օվկիանոսում հսկել օդային տարածությունը»,- ընդծեց Շաքարյանցը:
Դեկտեմբերի 10-ին Ռուսաստանի Դաշնությունը պաշտոնապես հրաժարվել է Գաբալայի ՌՏԿ-ի շահագործումից: Գաբալայի ՌՏԿ-ի շուրջ տարաձայնությունները սկսեցին 2012 թվականի փետրվարին, երբ Ադրբեջանը կտրուկ բարձրացրեց Գաբալայի ՌՏԿ-ի վարձակալության տարեկան վարձը՝ 7 մլն ԱՄՆ դոլարից հասցնելով 300 մլն ԱՄՆ դոլարի: