ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊԵՍ: Ուրուգվայի Արեւելյան Հանրապետության Ներկայացուցիչների պալատի նախագահ Խորխե Օռիկոն եւ նրա գլխավորած պատվիրակությունը նոյեմբերի 16-ին այցելեցԾիծեռնակաբերդի բարձունք` Հայոց ցեղասպանության զոհերի հիշատակը հավերժացնող հուշահամալիր: «Մենք պատիվ ենք ունեցել լինել առաջին երկիրը, որը ճանաչել է Հայոց ցեղասպանությունը»,-«Արմենպրես»-ի փոխանցմամբ` ընդգծեց Օռիկոն:
«Թեև բարդ քաղաքական իրավիճակ է, և տարաձայնություններ կան Լեռնային Ղարաբաղի հարցում, սակայն մենք պատրաստ ենք համագործակցել այն հարցերի շուրջ, որոնք միտված են խաղաղությանը:Ուրուգվայը խաղաղության երկիր է, և մենք փորձում ենք աջակցել նաև մյուս երկրներին` խաղաղություն ձեռք բերելու միջազգային իրավունքի հիմքում ընկած սկզբունքների, օրինակ` ազգերի ինքնորոշման և ինքնիշխանության սկզբունքի հիման վրա»,-ընդգծեց նա:
«Եվ սա դիվանագիտական պատասխան չէ, իրական պատասխան է, որովհետև մենք պետք է հստակ տեղեկություններ ունենանք և տիրապետենք իրավիճակին: Մենք եկել ենք, որ համագործակցենք խաղաղության համար»,- եզրափակեց Խորխե Օռիկոն:
Ուրուգվայի Արեւելյան Հանրապետության Ներկայացուցիչների պալատի նախագահ Խորխե Օռիկոյի գլխավորած պատվիրակությունը պաշտոնական այցով Հայաստան է ժամանել նոյեմբերի 12-ի երեկոյան` ՀՀ ԱԺ նախագահ Հովիկ Աբրահամյանի հրավերով:
Ուրուգվայն աշխարհում առաջին պետությունն է, որը ճանաչել Հայոց Ցեղասպանությունը 1965 թվականին: Հայաստանի Հանրապետության եւ Ուրուգվայի Արեւելյան Հանրապետության միջեւ դիվանագիտական հարաբերությունները հաստատվել են 1992 թ. մայիսի 27-ին: