Վրաստանի նոր իշխանությունները չեն կրկնի «ուկրաինական» սցենարը՝ բանտարկելով Սահակաշվիլիի մարդկանց. Ջոնի Մելիքյան

ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Վրաստանի հարցերով փորձագետ Ջոնի Մելիքյանն այն կարծիքին Է, որ Վրաստանում հազիվ թե կրկնվի «ուկրաինական» սցենարը, երբ ընտրություններում հաղթած կողմը բանտ կնստեցնի նախկին իշխանությունից իր քաղաքական հակառակորդներին: Այդ մասին նա ասել Է` «Արմենպրես» գործակալությանը մեկնաբանելով Վրաստանի խորհրդարանի նորընտիր խոսնակ Դավիթ Ուսուպաշվիլիի խոսքերն այն մասին, թե խորհրդարանում ստեղծվելու Է հետաքննչական հանձնաժողով, որը կքննի նախագահ Միխեիլ Սահակաշվիլիի կառավարման ժամանակաշրջանում կատարված «հանցագործությունները», ինչպես նաեւ երկրից նախկին իշխանության բարձրաստիճան մի քանի ներկայացուցիչների փախուստը:

«Իհարկե, մենք կդառնանք մերկացումների, աղմկալի դատական գործերի ականատեսները, բայց դա չպետք Է ու չի լինի երկրի նոր իշխանությունների նպատակը: Միխեիլ Սահակաշվիլիի թիմի չինովնիկներից ոմանք պատասխանատվություն կկրեն, ինչը իշխանափոխության տրամաբանության շրջանակներում Է»,-հայտարարել Է Մելիքյանը:

Փորձագետի կարծիքով՝ Վրաստանի նոր իշխանությունները, նոր խորհրդարանը եւ կառավարությունը, որը, ինչպես սպասվում Է, կհաստատվի հոկտեմբերի 25-ին, մեկ հիմնական խնդիր ունեն՝ ինտենսիվ գործունեություն սկսել գոնե այն հիմնական, Էական նախընտրական խոստումների իրագործման ուղղությամբ, որոնք տրվել են «Վրացական երազանքի» օգտին քվեարկած Վրաստանի բնակչությանը:

«Այն իրավիճակում, երբ Վրաստանում փաստորեն երկիշխանություն Է, խորհրդարանը եւ կառավարությունը համալրված են «Վրացական երազանք» կոալիցիայի անդամներով, իսկ տեղական ինքնակառավարման մարմինները, նահանգապետները եւ նախագահն ինքն ու նրան ենթակա կառույցները դեռեւս ներկայացված են Միասնական ազգային շարժման անդամներով եւ Միխեիլ Սահակաշվիլիի նկատմամբ լոյալ գործիչներով, ճկուն եւ փոխհամաձայնեցված քաղաքականության կրիտիկական անհրաժեշտություն կա, որը կբացառի վրեժը «նախորդ իշխանությունների» նկատմամբ: Այնուամենայնիվ, հարցերը լուծվելու են դատարանների միջոցով, կատարված հանցագործությունների եւ ապացույցների բավարար բազայի առկայությամբ, որոնց հավաքմամբ Էլ կզբաղվի խորհրդարանի նոր հետաքննչական հանձնաժողովը»,-նշել Է նա:

Մելիքյանը նաեւ հավելել Է, որ խորհրդարանական ընտրություններում Միխեիլ Սահակաշվիլիի Միասնական ազգային շարժում կուսակցության կրախը ցույց տվեց Վրաստանի բնակչության ծանր դրությունը եւ հիասթափությունը նրա թիմից ու վերջին տարիների բարեփոխումներից: «Կուսակցության վարկանիշը բավականին ցածր Է: Ինչպես եւ բոլոր երկրներում, հակառակորդ կողմի հաղթանակից հետո արդեն նախկին իշխանությունների առանձին կողմնակիցներ անցնում են երկրի նոր իշխանությունների կողմը, ինչպես դա եղավ Թբիլիսիում եւ Զուգդիդում (տեղական ինքնակառավարման մարմիններ), իսկ նրանց մի մասը, ովքեր առավել մեծ պատասխանատվություն են կրում իրենց արարքների համար, փախչում Է երկրից»,-նշել Է նա: Որպես օրինակ Մելիքյանը բերել Է Վրաստանից Ախալայա եղբայրների՝ ներքին գործերի նախկին նախարար Բաչո Ախալայայի եւ պաշտպանության նախկին փոխնախարար Դաթո Ախալայայի, պաշտպանության նախկին նախարար Դմիտրի Շաշկինի փախուստը, ինչպես նաեւ դեռեւս չհաստատված տեղեկատվությունն այն մասին, որ Վրաստանից փախել են ՆԳ նախարարության մի քանի բարձրաստիճան պաշտոնյաներ եւ արդարադատության նախկին նախարար Զուրաբ Ադեիշվիլին:-