Էդգար Հովհաննիսյանը պատերազմի վերսկսումը հավանական չի համարում
2 րոպեի ընթերցում
![Էդգար Հովհաննիսյանը պատերազմի վերսկսումը հավանական չի համարում](http://armenpress.am/resized/480/static/news/b/2012/06/684521.jpg)
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Ադրբեջանը խնդիրներ ունի իր բոլոր հարեւանների հետ: «Արմենպրես»-ի հաղորդմամբ` հունիսի 14-ին լրագրողների հետ հանդիպմանը Հայաստանի ազգային արխիվի փոխտնօրեն Էդգար Հովհաննիսյանը նշեց, որ սրված են այդ երկրի հարաբերությունները Իրանի, Վրաստանի, Ռուսաստանի հետ: «Ադրբեջանի ողջ քաղաքականությունը նավթոտ է, հարաբերություններն էլ են նավթոտ: Դրա միջոցով է նա փորձում նաեւ զիջումներ ստանալ Արեւմուտքից»,- ասաց Հովհաննիսյանը: Նրա փոխանցմամբ` հարեւան երկիրը միջազգային հանրությանն ուզում է ցույց տալ` իբր տիրապետում է իրավիճակին, եւ տարածաշրջանի անվտանգության ապահովումն իր ձեռքում է:
Իրեն վաճառելով Արեւմուտքին` Բաքուն ցանկանում է ստանալ զիջումներ, այն է` աչք փակել «ժառանգության» խնդրի վրա. գործող նախագահ Իլհամ Ալիեւը ցանկանում է 2013-ին կայանալիք նախագահական ընտրություններում իշխանությունը փոխանցել կնոջը կամ գնալ երրորդ ժամկետի: Երկուսն էլ ժողովրդավարական նորմերի խախտում են: Ընդհանուր առմամբ` Ալիեւը նպատակ ունի Հեյդարիկին` կրտսեր որդուն, հասցնել չափահասության եւ իշխանությունը սկուտեղի վրա մատուցել վերջինիս:
Հակառակ վերջին դիվերսիոն գործողություններին` պատերազմի վերսկսումը Հովհաննիսյանը հավանական չի համարում: «Շատ դժվար է պատերազմ սկսել մի բանի համար, ինչը քոնը չէ, այսինքն` գիտակցաբար քոնը չէ: Պատերազմի վերսկսման ռեալ պայմաններ չկան ռազմական հնարավորությունների, աշխարհաքաղաքական տեսանկյունից»,- ասաց բանախոսը: Միջազգային հանրության արձագանքը, Հովհաննիսյանի համոզմամբ, հստակ չէր. հայտարարությունները պետք է հասցեատերեր ունենային:
Հայկական կողմը ստեղծված դրությանը կարող է հակադարձել երեք գործոններով` մարտունակ բանակ, որն իր առջեւ դրված խնդիրը հստակ գիտի, արտաքին ճիշտքաղաքականության իրականացում, ժողովրդավարական արժեքների գերակայություն` աշխարհի համար ավելի ընկալելի դառնալու համար: Բանախոսի համոզմամբ` այս գործոնների առկայությունը Լեռնային Ղարաբաղը բազմիցս ապացուցել է: