368.59
Արա Գոչունյան. «ՄԻԵԴ-ի որոշումը կնպաստի Թուրքիայում Հայկական հարցի շուրջ ավելի բաց մթնոլորտի ստեղծմանը»
2 րոպեի ընթերցում
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Մարդու իրավունքների եվրոպական դատարանի որոշումը, ըստ որի` Հայոց ցեղասպանության ճանաչումը չի կարող հանցագործություն համարվել Թուրքիայում, կնպաստի Թուրքիայում Հայկական հարցի շուրջ ավելի բաց մթնոլորտի ստեղծմանը: «Արմենպրես»-ի հետ զրույցում նման կարծիք հայտնեց Ստամբուլի հայկական «Ժամանակ» թերթի գլխավոր խմբագիր Արա Գոչունյանը: Նրա խոսքով` այնպես չէ, որ միջազգային կառույցների որոշումները միանգամից արմատական փոփոխություններ են բերում Թուքիայում, սակայն դրական ազդեցություն, այնումենայնիվ, որոշ ժամանակ անց ունենում են:
«Թուրքիայում վերջին տարիներին ժողովրդավարական բարեփոխումների արդյունքում ազատ արտահայտվելու շոշափելի երեւույթներ տեղի ունենում են: Ազատ արտահայտման տեսակետից ամենացավոտ թեմաներից մեկը Հայկական հարցն է, որի կապակցությամբ մինչ այսօր արտահայտվելու խնդիր կա: Չնայած դրան` փաստ է, որ թուրքական զանգվածային լրատվական միջոցներով Հայկական հարցի շուրջ այլընտրանքային կարծիքներ ավելի հաճախակի են լսվում»,- ասաց Արա Գոչունյանը:
Հիշեցնենք, որ ՄԻԵԴ-ը մեղավոր է ճանաչել թուրքական իշխանություններին` թուրք պատմաբան Թաներ Աքչամին` Հայոց ցեղասպանության ճանաչման հետեւանքով հալածելու համար: Դատարանի որոշումը փաստում է, որ Թուրքիայի իշխանությունները բազմիցս խախտել են թուրք պատմաբանի խոսքի ազատության իրավունքը` Մարդու իրավունքների եվրոպական կոնվենցիայի 10-րդ հոդվածը:
Թաներ Աքչամը հայց էր ներկայացրել թուրքական իշխանությունների դեմ` պնդելով, որ վերջինս իր վրա ճնշումներ է գործադրում Հայոց ցեղասպանության հարցը հիշատակելու համար:
Բաժանորդագրվեք մեր ալիքին Telegram-ում