Միջազգային հանրությանը մոլորեցնելու Ադրբեջանի անհաջող փորձերը վտանգում են տարածաշրջանային անվտանգությունը
2 րոպեի ընթերցում
![Միջազգային հանրությանը մոլորեցնելու Ադրբեջանի անհաջող փորձերը վտանգում են տարածաշրջանային անվտանգությունը](http://armenpress.am/resized/480/static/news/b/2011/10/665376.jpg)
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Նյու Յորքում տեղի են ունենում ՄԱԿ-ի Գլխավոր ասամբլեայի հիմնական կոմիտեների նիստերը: Զինաթափման ու միջազգային անվտանգության հարցերը քննարկող ԳԱ առաջին կոմիտեում ելույթներ են ունեցել Հայաստանի եւ Ադրբեջանի պատվիրակությունները: Քննարկումների ընթացքում ադրբեջանցի պատվիրակը փորձել է մեղադրել հայկական կողմին 2001թ. Եվրոպայում սովորական սպառազինությունների համաձայնագրով նախատեսված թվաքանակից ավելի 8 տանկ թաքցնելու հարցում:
Նշելով, որ ադրբեջանական քարոզչական զինանոցի ծեծված փաստարկներով հագեցած պատվիրակության հայտարարությունն ակնհայտորեն դուրս են կոմիտեի այդ օրվա քննարկումների օրակարգը կազմող զինաթափման հրատապ հարցերի շրջանակից, ՄԱԿ-ում ՀՀ դեսպան Կարեն Նազարյանն իր խոսքում նշել է միջազգային հանրությանը մոլորեցնելու Ադրբեջանի անհաջող փորձերի մասին, որոնք վտանգում են տարածաշրջանային անվտանգությունն ու կայունությունն, փակուղի են տանում նաեւ տարածաշրջանում առկա հակամարտությունների լուծմանը միտված միջնորդների ջանքերը:
Ադրբեջանի կողմից միջազգային տարբեր ատյանների, այդ թվում' ՄԱԿ-ի Գլխավոր քարտուղարի, ԵԱՀԿ անդամ պետությունների ու Մինսկի խմբի համանախագահների կողմից շփման գծից դիպուկահարներին հեռացնելու եւ վստահության ամրապնդմանը ուղղված քայլեր ձեռնարկելու հորդորների անտեսումը ու Ադրբեջանի միլիտարիստական քաղաքականությունը հակասում են միջազգային պայմանագրերի, մասնավորապես' Եվրոպայում սովորական սպառազինությունների համաձայնագրի եւ ռազմական բյուջեների կրճատման, տարածաշրջանային զինաթափման, սպառազինությունների թափանցիկությանն ուղղված ՄԱԿ-ի բանաձեւերի տառին եւ ոգուն: